Maun no biin-alin sira, buongiorno!
Evanjellu ohin nian aprezenta mai ita ema leprozu ida nia kura (kf Mc 1,40-45). Ba ema moras ne’ebé hamulak ba Nia, Jezús hatán: «Ha’u hakarak, sai moos bá!» (v. 41). Nia temi fraze ida simples liu, ne’ebé tau kedas iha prátika. Defaktu «moras lepra lakon no nia hetan isin di’ak» (v. 42). Ida-ne’e mak Jezús nia estilu ho ema ne’ebé sofre: liafuan uitoan no hahalok konkretu.
Dalabarak, iha Evanjellu, ita haree Nia komporta an nune’e hasoru ema ne’ebé sofre: tilun di’uk no monok (kf Mc 7,31-37), paralítiku sira (kf Mc 2,1-12) no ema barak seluk ho nesesidade sira (kf Mc 5). Nia sempre halo nune’e: ko’alia uitoan no tuir liafuan sira mai kedas asaun sira: nia hakruuk, kaer liman, kura. Nia la dada naruk iha diskursu sira ka interrogatóriu sira, menus liután iha pietizmu no sentimentalizmu. Maibé Nia hatudu respeitu delikadu husi ema ida ne’ebé rona ho atensaun no atua ho lais, ho preferénsia hodi la dada atensaun.
Ne’e mak modu maravillozu ida atu hadomi, no oinsá halo di’ak mai ita imajina no asimila buat ne’e, Ira hanoin mós bainhira akontese katak ita hasoru ema sira ne’ebé komporta nune’e: sobriedade iha liafuan sira, maibé laran-luak iha asaun; lakohi atu hatudu an maibé pronto atu sai util; efikás iha tulun tanba dispostu atu rona. Amigu no amiga sira ne’ebé bele dehan ba sira: “Ó hakarak rona ha’u?” “Ó hakarak tulun ha’u?”, ho konfiansa katak ema sira hatán, kuaze ho Jezús nia liafuan: “Sim, ha’u hakarak, ha’u iha ne’e ba ó, atu tulun ó!”. Konkretude ida-ne’e importante liu iha mundu ida hanesan ita-nian, iha-ne’ebé virtualidade evanexente relasaun sira-nian parese hetan fatin boot liután ba beibeik.
Maibé mai ita rona oinsá Maromak nia Liafuan provoka ita: «Se ó-nia maun-alin ka ó-nia biin-alin ida isin tanan no kuran ai-han loroloron nian, no imi ida dehan ba nia: “Imi bá ho hakmatek, hamanas an no han bosu”, maibé la fó ba sira buat ne’ebé nesesáriu ba isin, manán sá loos?» (Kf Tg 2,15-16). Ida-ne’e apóstolu Tiago mak dehan. Domin presiza konkretude, domin presiza prezensa, enkontru, presiza tempu no espasu ne’ebé ita fó: la bele redús de’it ba liafuan furak sira, ba imajen iha screen, ba selfie momentu ida-nian ka ba mensajen lais nian. Maski insturmentu util, bele tulun, maibé ba domin ne’e la to’o, labele substitui prezensa konkreta.
Ohin mai ita husu: ha’u hatene rona ema sira, ha’u disponivel ba sira-nia pedidu sira? Eh ha’u hato’o aprezenta deskulpa sira, ha’u hein atu tulun, ha’u subar an iha lifuan abstratu no inutil sira? Konkretamente, bainhira loos mak dala ikus ne’ebé ha’u bá vizita ema moras no mesak – ida-idak bele hatán iha nia fuan–, eh bainhira mak dala ikus ha’u troka ha’u-nia programa sira atu hatán va ema ne’ebé husu ha’u-nia tulun?
Maria, ne’ebé lais atu tau matan, tulun ita atu sai pronta no konkreta iha domin.
