Nu’udar preparasaun ba selebrasaun tinan 25 prezensa FMA iha Timor-Leste, inspetoria oferese posibilidade atu komunidade ida-idak tulun labarik no foin-sa’e sira hakle’an Maria nia moris. Modalidade atu hakle’an maka hanesan halo konkursu oioin hanesan dezeñu, quiz marianu, lori Maria ba vizita família no kampu marianu.
Nune’e maka komunidade Maria Ausiliadora, Venilale programa kampu marianu ba loron tolu: loron 26 Maiu, loron 4 Juñu no ohin loron 9 Juñu, 2012. Kampu ne’e hala’o loron tomak ho destinatáriu labarik sira husi nivel eskola elementária, pre-sekundária no foin-sa’e sira eskola sekundária nian. Irmán no pre-aspirante sira mak anima no tulun sira atu hakle’an kona-ba Maria iha Bíblia. Kampu fahe tuir ba fatin lima ne’ebé sasin Maria nia dalan fiar nian, hahú husi Maria nia sín dahuluk iha Nazaré, nia vizitasaun ba Ain-Karim, fatin Jezús moris bá katak Belém, Kaná iha-ne’ebé Jezús halo milagre dahuluk liuhusi Maria nia intersesaun no sín ikus iha Jeruzalém.
Labarik no foin-sa’e sira kontente tebes tanba ho esperiénsia ida-ne’e sira bele koñese liután Maria, tama kle’an liután iha Maromak nia futar Liafuan no deskobre Maria nia prezensa iha sira nia moris rasik. Kampu ne’e lori sira ba kompromisu atu moris tuir Maria nia virtude sira iha sira-nia moris.
