Amu-Papa Francisco ohin remata ninia vizita apostólika iha Tailándia no ohin kontinua ba Japão. Entre enkontru oioin ne’ebé nia hala’o, iha ida ho konsagradu no katekista sira, iha loron 22 Novembru.
Iha pergunta ida ne’ebé Amu-Papa Francisco husu: “Oinsá ha’u kuda fekundidade apostólika?”, no nia afirma katak hodi fanun ba beleza, ba admirasaun, ba surpreza de’it mak ita iha kapasidade atu loke orizonte foun no hamosu interrogative foun sira. No nia esplika: “Na’i la bolu ita atu haruka ba mundu atu impoin ba ema sira obrigasaun sira ka naha sira todan liu duké sira iha ona (no barak), maibé atu fahe ksolok ida, orizonte furak ida, foun no surpriendente”.
Amu-Papa mós husu atu “keta ta’uk inkultura Evanjellu”. Papa Francisco dehan: “Ida ne’e dudu ita atu keta ta’uk buka símbolu no imajen foun sira, múzika partikulár ida ne’ebé tulun tailandés sira atu desperta ba maravilla ne’ebé Na’i hakarak fó mai ita. Ita keta ta’uk atu inkultura Evanjellu ba beibeik”.
“Ba ema barak – Amu-Papa kontinua – “fiar sarani mak fiar estranjeira ida, relijiaun estrajeiru sira-nian. Faktu ida-ne’e dudu ita atu buka ho aten-barani modu atu haklaken fiar ‘iha dialetu’,hanesan inan ida hananau knananuk sira atu hatoba ninia kosok-oan”.
No Papa Francisco konfirma: “Ita tenke husik Evanjellu kolu ita husi roupa furak, maibé estranjeira, atu nalian ho múzika ne’ebé imi-nian rain rasik nian no halo ita-nia maun-alin sira-nia fuan fekit ho beleza hanesan ne’ebé atrai ita-nia fuan”.
Hodi hanoin inísiu vokasaun konsagradu/a nian, Amu-Papa dehan katak barak husi ita sei foin-sa’e tuir atividade sira atu vizita ema ne’ebé presiza no husi ne’e “Na’i rasik vizita ita, hodi halo deskobre bolun atu fó buat hotu ba Nia no, iha movimentu sai nian, mkak Na’i hetan ita”. Sai sarani, Amu-Papa afirma mak hasoru ema seluk! “Nune’e de’it mak imi sei sai sinál konkretu mizerikórdia moris no operante Na’i nian; sinál unsaun Santu iha rai sira-ne’e”.
Maibé, “unsaun husu orasaun. Fekundidade apostólika husu no hetan kbiit hodi kuda intimidade iha orasaun. Intimidade ida hanesan avó sira-nian ne’ebé badinas harohan tersu. No “lahó orasaun, ita-nia moris tomak no ita-nia misaun lakon sentidu, forsa no fervór”.
Amu-Papa hateten hodi sita S. Paulo VI ne’ebé dehan katak “inimigu aat liu evanjelizasaun nian mak falta fervór”. No ita haboot fervór “iha enkontru rua: ho Na’i no ho maun-alin sira”.
