Dili – Akompañamentu liuhusi enkontru pesoál eh kolókiu mak tema formasaun permanente iha tinan ne’e ba Irmán perpétua sira. Nune’e, mak grupu Irmán sira husi segunda idade dedika tempu atu halo reflesaun no partilla kona-ba “momentu privilejiadu atu habiit komuñaun, deskobre Maromak nia hakaran no hakle’an iha vida prátika Institutu nia espíritu” (Konst.34) ida-ne’e.
Reflesaun hahú ho aprezentasaun ida husi Padre Pietro Raimondi kona-ba akompañamentu, husik ema seluk akompaña atu to’o ba objetivu moris nian. Nu’udar ema ne’ebé hadomi fotografia, nia uza foto-linguajen iha ninia aprezentasaun.
Hafoin Irmán sira simu sínteze ida husi Amu-Bispu Virgílio do Carmo da Silva nia konferénsia halo ba Irmán Perpétua sira primeira idade nian iha loron 1 Jullu liubá. Irmán sira reflete kona-ba saida mak kolókiu bazeia ba esperiénsia pesoál, hafoin konfronta ho Madre Mazzarello nia esperiénsia hodi ba haree iha ninia Surat sira. Madre Mazzarello akompaña Irmán sira la’ós de’it sira ne’ebé besik maibé mós sira ne’ebé dook liuhusi ninia Surat sira. Pergunta seluk atu reflete no fahe mak rekizitu sira atu garante pátika di’ak kolókiu nian husi superiora nia parte nune’e mós husi Irmán nia parte.
Tuir Ir Maria Américo Rolim (eis Konselleira jerál ba Ámbitu Formasaun), atu kolókiu ida bele hetan valorizasaun boot liután, presiza iha, entre buat seluk:
- Klima ida fiar nian no hakaran komuñaun loos nian ne’ebé prepara antes no kontinua iha relasaun interpesoál, iha klima komunitáriu, iha misaun edukativa.
- Tanba ne’e ema ne’ebé akompaña tenkéser ema komuñaun nian, nakloke ba Espíritu nia inspirasaun sira, espesialista iha umanidade, prudente no rai segredu, kapasidade atu husik ema korrije nia, atu kapta no valoriza sinál ki’ik asaun Maromak nian no Irmán sira-nian. Iha ninia pobreza, nia konfia iha Na’i ne’ebé serbisu iha ema ida-idak nia fuan, ema sira ne’ebé Na’i entregaba nia.
- Iha konxiénsia kona-ba kolókiu nu’udar tulun malu: ema sai buras bainhira fahe ho ema seluk ninia esperiénsia rasik kona-ba Maromak no difikuldade sira atu “nina hakaran ita-nia ai-han”, hanesan Jezús.
- Preparasaun akompañadora nian. La to’o kursu sira. Esperiénsia pesoál akompañamentu nian no prátika akompaña ema seluk sai eskola loos ba ida ne’ebé tau nia an disponivel atu aprende liuhusi gia Espíritu nian.
Atensaun ida atu haree mak Don Bosco ko’alia kona-ba forum esternu no forum internu. Forum esternu: ita nia kolókiu ho superiora sira, hotu-hotu esternu de’it kona-ba saude, estudu ou iha vida atividade apostólika, difikuldade ne’ebé hasoru iha vida relijioza ninian, vida fraterna ne’ebé kontribui ba ema nia moris. Forum internu: buat ne’ebé liga ho konxiénsia se ita la pronta atu fahe, superiora la ezije. Buat ne’ebé liga ho konxiénsia ne’e livre atu fahe no superiora labele obriga atu fahe buat ne’ebé Irmán la sente atu fahe. Kona-ba konxiénsia morál Irmán sira livre no iha Konfesór atu hakbesik.
Iha Kreda iha mós tradisaun diresaun espirituál, nu’udar tulun ne’ebé ema ida, liuhusi komunikasaun fiar nian, oferese ba ema seluk, atu nia sai nia an rasik tomak loloos, no, hodi diretór nia gia, tulun no apoiu, nia bele ho liberdade tuir dalan vida espirituál nian to’o ba santidade.
