Baucau –Relijiozu/a kongregasaun oioin husi Dioseze Baucau ohin, 24 Abríl, halibur hamutuk ho D. Basílio, Bispu Dioseze Baucau, atu selebra hamutuk Festa Páskua. Maibé, molok selebrasaun eukaristia nian, relijiozu/a sira halo avaliasaun kona-ba servisu komisaun relijiozu sira dioseze Baucau nian iha períodu ikus ne’e, hafoin, halo votasaun atu hili elementu foun komisaun nian ba períodu foun. Rezultadu votasaun mak Ir Jacinta FMA, Ir Tony (marista), Ir Felizarda fdcc, padre Justiniano SDB no Ir Theresia OSU. Tinan ne’e membru komisaun na’in lima.
Marka prezensa iha enkontru ne’e, Ir Paola Battagliola, vise-prezidente husi Konferénsia Superiores maiores nian ne’ebé haksolok, tanba iha Baucau iha ona komisaun relijiozu/a sira-nian ne’ebé sai sasin komuñaun iha diversidade karizma nian atu serví Kreda lokál. Nia hein atu komisaun ne’e bele sai prezente mós iha enkontru ne’ebé Konferénsia Superiores Maiores sei hala’o iha fulan Jullu oin atu halo mós eleisaun ba konsellu foun.
Selebrasaun iha Eukaristia prezide husi Amu Basílio, ne’ebé iha omilia foka liu ba sasin radikál kona-ba kompromisu batizmál. Ita-nia fiar hatuur iha Apóstolu sira-nia fiar ne’ebé haree ho matan Jezús Kristu. Ita iha vida konsagrada kontinua sasin apóstolu sira-nian, maski ita la haree ho matan no “deskoberta kona-ba Jezús ita ida-idak mak tenke halo”. Valór vida konsagrada nian mak sai sasin Kristu moris-hi’as nian, maibé baze mak batizmu. Sakramentu hotu nia fundamentu mak batizmu, no “batizmu mak kompromisuu ho Jezús Kristu nia vida”. Tuir Amu-Bispu, ohin loron batizmu sai de’it atividade sosiál, kulturál ida no haluha tiha kompromisu ne’e. Ita relijiozu sira mós, dalabarak sukat ita-nia kompromisu sira ho obra sosiál no la’ós ho santidade moris nian. “Krize oioin ne’ebé mosu tanba falta kompromisu batizmál ne’e”. Amu Basílio fó ezemplu katak, bainhira foin halo primeirus votus ita dehan “Na’i, ha’u mak ne’e”, hafoin, mosu konflitu uitoan ho superiór/a, problema ruma, ita hateten “Na’i, ha’u hakarak fila ba uma”. Ne’e tanba sá? Tanba ita la moris ho profundidade no radikalidade ita-nia kompromisu batizmál, hodi hametin liután profisaun konsellu evanjéliku sira-nian.
Molok misa remata, Amu Basílio haraik bensan espesiál ba membru lima foun komisaun relijiozu/a sira-nian no hato’o lia-menon ruma tan ba relijiozu/a sira, foti fali liafuan sira husi Kardeál João Brás, husi Kongregasaun ba Vida Konsagrada iha Roma. Nia hateten katak tuir Roma, iha nasaun haat ne’ebé fó vokasaun barak ba kongregasaun oioin: Índia, Indonesia, Filippinas no Timor-Leste. No sira fó atensaun ba bispu sira atu “kuidadu, tanba kongregasaun barak mai Timor la’ós atu serví Kreda maibé atu kasa vokasaun”. Roma mós husu “saida mak kongregasaun 84 halo iha Timor-Leste?” Ne’e mak preokupasaun boot bispu sira-nian, atu vida konsagrada, loos duni, “serví kreda lokál no la haluha ninia knaar fundamentál atu haklaken Evanjellu, atu sai interrogasaun ba mundu ho sira-nia estilu moris nian”.
Selebrasaun remata ho almosu hamutuk no kumprimenta boas festas paskál ba malu, molok Amu-Bispu despede atu halo nia vizita ba Lacluta.
