Sidade Vaticano – Sakramentu sira, karizma sira no karidade. Ne’e mak trinómiu ne’ebé Papa Francisco foka iha kaktekeze kuarta 6 Novembru nian, iha Prasa S. Pedro. Hodi fó kontinuidade ba semana kotu ne’eb´eko’alia kona-ba komuñaun santu sira-nian, ohin nia ko’alia kona-ba komuñaun iha sasán santu sira.
Santu Padre esplika katak komuñaun entre sarani sira sai boot liuhusi partisipasaun iha soin espirituál, hodi konsidera ho modu partikulár sakramentu sira, karizma sira no karidade.
Ho relasaun ba sakramentu sira, Francisco fó hanoin katak sira la’ós aparénsia nune’e mós ritu, maibé Kristu nia kbiit. “Bainhira ita selebra Misa, iha Eukaristia iha ne’ebá iha Jezús rasik moris nian, ne’ebé halibur ita, halo ita sai komunidade, halo ita adora Aman”.
No se iha parte ida Igreja mak “halo” sakramentu sira, husi parte seluk sakramentu sira mak “halo” Igreja, konforme esplikasaun Amu-Papa nian. Sakramentu sira mak harii Igreja, hodi hahoris oan foun sira ba Maromak nia povu, no dudu sarani sira atu sai misionáriu.
Aspetu seluk komuñaun iha sasán santu sira mak komuñaun karizma nian. Amu-Papa hateten katak karizma mak prezente ida Espíritu Santu haraik, maibé la’ós atu subar, maibé atu komunika ba ema seluk, hodi utiliza ba Maromak nia povu nia di’ak.
“Karizma sira mak grasa partikulár fó atu halo di’ak ba ema barak. Karizma mak atitude ne’ebé moris iha konxiénsia no esperiénsia ema ruma nian ne’ebé simu bolun atu tau sira ba komunidade nia di’ak”
Ikusnian, Francisco ko’alia kona-ba karidade, hodi resalta katak karizma sira importante, maibé sira mak meiu atu sai boot karidade no domin. “Lahó domin, don hotu la serve buat ida ba Igreja, tanba iha ne’ebé la iha domin iha mamuk ida no mamuk ne’e egoízmu mak sei hakonu. No ha’u husu ba imi s: se ita hotu sai egoízta, ita bele moris iha komunidade, iha dame?”
Papa Francisco destaka katak jestu ki’ik sira domin nian lori efeitu ba ema hotu. Tanba ne’e, moris iha unidade iha Kreda, komuñaun karidade nian signifika la buka interese rasik, maibé fahe maun-alin sira nia terus no ksolok sira.
“Solidariedade fraterna la’ós modu ida atu ko’alia, maibé parte integrante komuñaun entre sarani sira. Se ita moris nia, ita sai iha mundu “sakrementu” Maromak nia domin nian.
