Dili – Iha loron dedika ba Na’i-Feto Maria Auxiliadora, 24 Maiu 2018, ho fuan haksolok familia Salesiana, foinsae sira, Antigos/ Antigas alunos, ohin selebra hamutuk ho labarik 25 ne’ebe ba dala uluk simu Jesus nia isin iha loron ida ne’e.
Molok atu to’o ba Festa ne’e, komunidade Edukativa hamutuk ho Irman sira halo planu hamutuk hodi lori Nain Feto nia ilas ba familia sira nia uma hodi reza tersu hamutuk no mos halo novena ba loron sia ho Nain Feto nia presenza iha familia ida-idak.
Familia sira sente kontente no apresia liu ba prezensa Nain Feto Maria Auxiliadora nian hodi halo Novena hamutuk ho familia tomak durante loron sia nia laran.
Iha loron 23 Maiu, loron Vijilia ba Festa Maria Auxiliadora, iha kalan velada hamutuk ho familia no Antigos/as alunos sira. Iha kalan ne’e mos foinsae no familia balun fahe sira nia Esperensia forte ho Nain Feto. Uluk nanain sira haree nain Feto nu’udar inan, tulun nain e guia ba sira nia moris pesoal no mos ba sira nia familia sira sente Nain Feto nudar defensora.
Iha loron 24 Maiu, lokraik tuku tolu Sarani, estudante, labarik sira no mos komunidade edukativa sira halo prosisaun ho Nain Feto nia ilas husi komunidade ba Parokia Balide, hafoin taka ho misa solene ne’ebe preside husi Amo Paroko Padre Adriano Ximenes. Iha omilia nia fo atensaun liu ba Nain Feto nia atitude matan moris ba ba ema nia presiza. Nain Feto modelo ba ita hotu atu imita tuir. Tan ne’e mak ita bolu Nia nudar tulun nain ba ita.
Tinan ne’e mos ita selebra tinan 150 uma Kreda Basilika Maria Auxiliadora nian ihaTurin/Italia, ne’ebe Don Bosco rasik harii nuudar monumento agradesementu nian ba Nain Feto Maria tulun nain. Hamutuk ho Familia Salesiana tomak ita hasae hahi no agradese ba Maromak liu husi Nain Feto nia prezensa iha ita nia moris no misaun.
(Ines Freitas)
