– Karizma Salezianu nia furak mak servisu hamutuk hodi buka meiu oioin atu bele sai evanjelizadór/a iha foin-sa’e no labarik sira nia leet. Iha realidade manifesta katak ema hotu iha interese no hakarak boot atu serbisu ba foin-sa’e no labarik sira nia di’ak. Ne’e mak esperiénsia furak ne’ebé ami nia komunidade esperimenta bainhira ami halo ami nia projetu komunitáriu ho komunidade edukativa iha loron 10/1/2018. Leigu no foin-sa’e sira hamutuk na’in 8 hamutuk ho Irmán sira na’in 4.
Programasaun ispetoria ne’ebé iha ona ami elabora fali modalidade balun hodi adapta ba ami nia realidade Cailaco tanba komunidade úniku iha parte dioseze Maliana nian ho realidade no mentalidade ne’ebé oin seluk. Ho esperiénsia ne’ebé komunidade edukativa iha ona tulun ami atu buka maneiras foun atu bele evanjeliza ho modun kreativu tuir estilu no karizma ne’ebé ita nia fundadór sira husik hela mai ita.
Ami hahú projetu komunitáriu ho orasun hodi husu Na’i nia akompañamentu hafoin ami kontinua lee no reflete hafoin hato’o sujestaun, halo korresaun no modifika parte balun hodi adapta tuir realidade. Ema hotu ativu tebes hodi aprezenta meiu sira ne’ebé relevante ho situasaun, hodi buka atu oferese buat ne’ebé ema presiza duni liu-liu iha parte espirituál nian.
Komunidade edukativu ne’ebé prezente hotu-hotu hein katak buat ne’ebé ami projeta ona bele realiza duni hodi lori benefisiu ba foin-sa’e, labarik no sarani sira ne’ebé ami sei hasoru iha ami nia apostoladu. Remata tiha enkontru ami merenda hamutuk hafoin ida-ida fila ba nia fatin.
