Venilale – Ho fuan oan sira nian, ne’ebé nakonu ho domin no gratidaun ami komunidade Madre Mazzarello – Irmán sira, Komunidade Edukativa no estudante ETV hasa’e hahi no agradese ba Aman Maromak ba prezensa Madre Jerál, Madre CHIARA CAZZUOLA iha Institutu Filhas de Maria Auxiliadora, nu’udar MADRE MAZZARELLO nia saseluk no mós sai tali uniaun no sentru unidade nian ba FMA sira iha mundu tomak.
Iha loron 24 kalan, irmán sira no interna sira espresa ami-nia gratidaun ba La Madre, ho dansa kultura husi kontinente 5 nian; Europa, Ámerika, Ázia, Áfrika no Oceania. Objetivu husi dansa ne’e, atu dehan katak; maske ho kultura oioin maibé espíritu Valdoco no Mornese ne’ebé FMA sira lori ba kontinente hirak ne’e mak ida nafatin.
Hafoin iha loron 25 kalan, nu’udar familia ida, ami oferese Rozariu ba Madre Jeral, atu Inan Tulun Nain nafatin proteje no hamahan Madre iha ninia misaun. Aleinde ne’e, ami reza mós ba FMA sira iha kontinente 5, atu Inan Tulun Nain hamatan no proteje Irmán sira,foin-saé, labarik no ema hotu ne’ebé Irmán sira tau-matan. Nune’e nafatin sai monumentu moris Don Bosco nian ba Maria Auxiliadora iha tempu hotu.
Nune’e ohin, 26 Abríl 2022, iha loraik irmán sira hamutuk ho reprezentante professor/a, interna no reprezentante estudante ETV hasa’e misa agradesimentu ba jerál iha kapela ETV nian ne’ebé preside husi Pe. Abrão Pinto Soares SDB. Kristu Moris Hias ne’ebé sai sentru ba ita-nia moris, haraik bensa no grasa oioin ba Madre Jeral, nune’e liu husi Madre nia liafuan no nia hakerek sira enkoraja FMA sira sai sasin Kristu Moris Hias nian ba foin-sa’e sira. Ohin mós molok misa Ir. Carolina esplika ba komunidade edukativa no estudante sira konaba festa gratidaun nia orijin.
Dala ida tan Obrigada, GRAZIE no Thank You Madre.
(Alice Filipe FMA)
