Dili – Ita hotu hatene katak iha loron 4 Abríl akontese inundasaun no rai halai iha Dili no fatin sira barak iha Timor-Leste no Indonesia. Ema liu haat-nulu lakon moris no lakon hela-fatin, sasán. Ho situasaun ne’e halo ema sira-ne’e sai deslokadu hodi buka mahon iha fatin seluk, inklui iha komunidade Fma, Balide, Don Bosco (Comoro) no iha Eskola Maria Auxiliadora.
Iha eskola Maria Auxiliadora mai uma-kain 35 no totál ema 170. Refujiadu sira-ne’e liuliu mak grupu vulneravel liu, katak inan isin-rua, inan oan nurak, aleijadu sira no ferik sira. Sira mai refujia an husi loron 5 Abríl to’o loron 24 Abríl, loron komemorasaun Na’i-Feto Auxiliadora nian.
Ohin, 28 Abríl, bainhira komunidade halo avaliasaun, Irmán sira salienta katak, maski iha situasaun emerjénsia, maibé, komunidade pronta tanba durante tempu kuarezma nia reflete no fahe kona-ba Amu-Papa nia ensíklika Fratelli Tutti, atu moris kuarezma ida fraternidade nian, hodi sai bá 
hasoru maluk sira ne’ebé presiza. No ida-ne’e ita realiza iha tempu susar inundasaun nian. Irmán ida até dehan katak, refujiadu sira-nia prezensa mak prezente Páskua nian ba Irmán sira, atu bele moris no hatudu sira-nia domin. Preparasaun espirituál ne’e, mak halo atu ita loke ita-nia fuan no odamatan ba maluk no ho lalais prepara aula sira no seluk tan ba maluk sira. Irmán hotu iha semana tolu nia laran saran an hodi la sukat, prevé saida mak ema nia nesesidade, atende inan no ki’ik-oan sira, labarik sira hanesan iha família ida (nono bee manas atu inan sira hemu no hariis, halo sasoro, etc…).
Haree fali ba semana tolu ne’e, ita haree Timor-Oan barak ne’ebé laran-luak atu fó apoiu oioin hanesan hahán, hatais, nesesidade ijiene nian. Aleinde ne’e, iha grupu no asosiasaun sira ne’ebé oferese apoiu materiál, counselling, asisténsia médika, formasaun ba inan sira, divertimentu no animasaun ba labarik sira… Serbisu hamutuk ne’e hatudu oinsá importánsia rede nian, sinodalidade atu bele iha efikásia boot liután iha ita-nia servisu ba maun-alin deslokadu sira. Komunidade FMA sira troka malu tein hahán ba deslokadu sira.
Buat pozitivu ida ne’ebé ami esperiénsia mak prezensa foin-sa’e sira nian ne’ebé oferese an atu tulun Irmán sira husi komunidade S. José no Eusebia Palomino. Foin-sa’e sira ne’e maioria antigu/a alunu/a Eskola Maria Auxiliadora nian. Sira sai tulun boot iha preparasaun hah’an, iha animasaun ba labarik sira, iha vizita ba família afetadu sira nia fatin. Foin-
sa’e sira-ne’e ikusmai, hakarak harí grupu voluntáriu Palomino, atu kontinua servisu ne’ebé sira hahú halo.
Bainhira deslokadu sira hahú sai husi ami-nia fatin, sira buka Irmán sira no foin-sa’e sira atu espresa sira-nia gratiduan, nakonu ho emosaun. Iha bebé na’in haat ne’ebé moris durante hela iha ami-nia fatin: bebé sira-ne’e hotu lori naran “Auxílio”, nu’udar agradesimentu ba Na’i-Feto ne’ebé simu sira iha ninia uma. Hahalok ne’e hotu hatudu katak sira sente duni Irmán no foin-sa’e sira-nia saran an gratuitu no espíritu família.
Ita hein sira bele hetan fatin foun atu harí sira-nia uma, tuir buat ne’ebé governu promete.
(Komunidade Eusebia Palomino)
