Kongresu Eukarístiku da-50 loke horisehik liha Dublin, Irlandia ho partisipante husi nasaun 120 liu, no sei hala’o husi loron 10-17 Juñu. Nia tema maka: “Eukaristia: Komuñaun ho Kristu no entre ita”.
Amu Papa nia reprezentante, Kardeál Marc Ouellet, selebra misa iha tuku 3 loraik ho konselebrante sira Arsebispu Diarmuid Martin, Prezidente kongresu nian; Arsebispu Piero Marini, Prezidente Komisaun Pontiifisia Ba Kongresu Eukarístiku; Arsebispu Toulouse nian, Robert LeGall; no Kardeál Thomas Collins, Arsebispu Toronto nian.
Iha ninia omilia, Kardeál Marc Ouellet, dehan: “Di’ak tebes katak Providénsia hakarak atu enkontru ida-ne’e hala’o iha Irlandia. Nasaun ida-ne’e ne’ebé famoza ho ninia fafurak naturál, ninia ospitalidade no ninia kultura ne’ebé riku, maibé liuliu ba ninia tradisaun fidelidade nian ba fiar Katólika ne’ebé kle’ur liu”.
Nia tutan katak “Irlandia ninia istória fidelidade maka’as nian hariku la’ós de’it tasi-ibuns isra iha ne’e, maibé liuhusi ninia oan mane no feto misionáriu/a sira, tulun Kreda atu lori Evanjellu ba tasi-ibun dook sira”.
“Ohin-loron Kreda iha Irlandia terus no enfrenta daudaun dezafiu sériu kona-ba fiar. Konxiente kona-ba dezafiu sira-ne’e ita hateke ba ita Na’i , ne’ebé hafoun, kura kanek no habiit nia povu nia fiar. Ha’u hatene husi ha’u-nia esperiénsia rasik iha Kongresu ikus iha Quebec City, katak eventu ida hanesan ne’e lori bensan barak ba Kreda lokál no partesipante hotu, inklui sira ne’ebé fó apoiu liuhusi orasaun, servisu voluntariadu nian no solidariedade. Nune’e, ita reza ho konfiansa ba Jezús eukarístiku atu akontesimentu da-50 iha Kreda universál lori bensan ba Irlandia iha tempu turbulentu ida-ne’e no ba imi hotu”.
“Hanesan dokumentu preparatóriu ba Kongresu Eukarístiku ida-ne’e fó hanoin, ema hotu bele moris buat ne’ebé hanaran ‘espiritualidade komuñaun’ nian hodi tau hamutuk kultu no saran an rasik ne’ebé selebra iha Misa laran”.
Ko’alia durante serimónia ne’e, Prezidente Kongresu Eukarístiku da-50, Arsebispu Diarmuid Martin hateten: “Ita reza atu foin-sa’e Irlandia sira bele koñese ksolok no plenitude, ksolok esperansa nian no bolun ba domin no kompromisu ne’ebé mai husi enkontru ho Kristu”.
Arsebispu Martin tutan tan: “Kreda Irlandia nian iha hela dalan renovasaun nian. Kreda ne’e la’ós ita-nia atu ita projeta filafali; nia maka prezente ida ita simu husi Na’i hodi Espíritu nia mata-dalan iha istória no tuir Maria no santu sira nia ezemplu”.
Nu’udar rekoñesimentu ba pasadu, durante selebrasaun abertura nian iha Royal Dublin Society (RDS) hatudu sai monumentu fatuk nian ida hanaran “healing stone” (fatuk kura nian) nu’udar meiu atu rekoñese abuzu ba labarik sira. “Healing Stone “ iha largura boot, husi granitu Wicklow nian no iha nia bahat orasaun ida ne’ebé sobrevivente ida husi abuzu klerikál halo. Orasaun ne’e uluk uza mós iha Liturjia Lamentasaun nian ne’ebé selebra iha Pre-Katedral Dublin nian iha 2011.
P. Kevin Doran, Sekretáriu jerál ba Kongresu Eukarístiku 2012 hateten: “Fatuk ko’alia kona-ba permanénsia. Bainhira dehan katak buat ruma “bahat iha fatuk” signifika katak nia atu hela nafatin no la’ós pensamentu ida ne’ebé liu de’it. Fatuk reprezenta determinasaun firme atu serbisu ba kura kanek no ba renovasaun”.
Informasaun seluk bele hetan iha http://www.iec2012.ie
