Loron Vida Konsagrada – 2017
Dili – Tinan-tinan sai ona lisan ida atu Relijiozu/a sira iha Timor-Leste selebra hamutuk “Loron vida Konsagrada” ne’ebé monu iha 2 Fevereiru. Tinan ne’e, “Conferência dos Superiores Maiores TL” organiza loron rua formasaun nian hamutuk ho Bispu Dili nian, D. Virgílio do Carmo da Silva SDB ne’ebé fahe kona-ba Amu-Papa nia Surat “Misericordia et misera” no ho Núnsiu Apostóliku D. Joseph Salvador Marino, ne’ebé fahe kona-ba tema “Relijiozu/a sira, ema enkontru nian”.
Amu-Bispu Virgílio ko’alia ba relijiozu/a sira iha loron 1 Fevereiru, hodi salienta aspetu importante sira Surat Misericordia et misera. Nia hateten katak Maromak nia domin inkondisionál, no “sinál vizivel Aman Maromak nia domin mak perdaun”. Tan ne’e mak Amu-Papa apela liuliu ba amlulik sira atu sai akolledór/maksimuk ba ema sira ne’ebé hakbesik atu husu Maromak nia perdaun. Nia dehan katak ita presiza iha “konversaun pastorál atu bá liután periferia… sai husi ita-nia comfort zone sira. Misericordia et misera propoin dalan haat atu selebra konversaun: “eukaristia, rona Maromak nia Liafuan, lee Sagrada Eskritura no sakramentu rekonsiliasaun”.
Depoizde konferénsia husi D. Virgílio no sesaun pergunta nian, ne’ebé foka liu ba “konversaun pastorál”, partisipante sira kontinua ho serbisu iha grupu hodi fahe ba malu kona-ba aleinde, oinsá kontinua hala’o Amu-Papa nia lia-menon kona-ba moris mizerikórdia nian, nune’e mós identifika dezafiu sira no resposta ba dezafiu sira hodi fó rekomendasaun eh sujestaun sira atu bele hatán ba ema sira ita-nia tempu nia hakilar.
Pontu balun importante ne’ebé husu husi kongregasaun sira mak oinsá halo rede no tau hamutuk sira-nia karizma atu hatán ba foin-sa’e sira ne’ebé iha sidade Dili presiza liu ita-nai tulun, iha aspetu vida morál. Sujestaun seluk mak atu “Conferência dos Superiores Maiores”, halo planu estratéjiku atu hatán ba realidade no atu la’o hamutuk ho “Conferência Episcopal TL”.
Loron 1 Fevereiru takak ho adorasaun hamutuk iha Katedrál Dili, ne’ebé prepara no anima husi Komisaun Formasaun Interkongregasionál. Prezente iha loron dahuluk enkontru ne’e besik relijiozu atus rua.
