RV – Iha katekeze 11 Novembru nian, Papa Francisco dedika ba tema konvíviu familiár, katal toman atu aprende, husi kedas ki’ik, atu partilla soin sira moris nian. Tuir Papa Francisco, ne’e , ne’ebé nia símbolu mak reuniaun família nian iha meza ba refeisaun.
“Partilla ai-han nian, afetu nian, istória sira-nian, akontesimentu sira-nian, mak esperiénsia fundamentál ida”, Amu-Papa hateten, hodi hatutan katak konvíviu mak termómetru seguru atu sukat saúde relasaun sira-nian. Se família la ko’alia ba malu iha meza, porezemplu, tanba membru sira liga ba televizaun eh ba selulár, nia “ladún família”, Papa Francisco afirma.
Papa Francisco esplika katak kristianizmu soi nu’udar vokasaun espesiál sosiabilidade. Hodi partisipa iha Eukaristia, família hetan purifikasaun husi tentasaun atu taka iha an rasik no haluan ninia baliza ninia fraternidade rasik tuir Kristu nia fuan.
Sosiabilidade ne’ebé hahoris iha família no Eukaristia haluan, Amu-Papa dehan, sai oportunidade krusiál ida basá ohin loron ita haree ema taka an no harii muru barak. Eukaristia no família sira ne’ebé habosu husi nia bele manán taka-an sira no harii ponte sira akollimentu no karidade nian. “La iha ki’ik-oan sira, órfaun sira, ema fraku sira no deziludidu sira, dezesperadu sira no abandonadu sira ne’ebé konvíviu eukarístiku família sira-nian labele la fó kbiit”.
Santu Padre rekoñese katak ohin loron iha obstákulu barak ba konvíviu familiár, maibé presiza hetan modu ida atu rekupera nia. “Iha meza ema ko’alia, ema rona. La iha silénsiu ida, silénsiu ne’ebé la’ós silénsiu monje sira-nian, silénsiu egoízmu nian: ida-idak soi ninia televizaun eh ninia komputadór… no la ko’alia. Lae, la iha silénsiu”.
Amu-Papa halo votus no harohan atu iha Jubileu Mizerikórdia nia laran konvíviu familiár bele sai buras liután.
