RV – Papa Francisco dedika katekeze kuarta, 2 Marsu, ba tema “mizerikórdia no korresaun”. Nia ko’alia kona-ba Maromak nu’udar aman ne’ebé hadomi no, tanba ne’e mak nia korrije nia oan sira bainhira presiza.
Maibé dalan mizerikórdia divina mak ida korresaun ho domin, ne’ebé husik odamatan nakloke ba esperansa. Papa Francisco esplika katak Maromak lakohi sakrifísiu rituál sira, maibé indika dalan justisa nian; hanesan profeta Isaías hateten, ba Maromak nia la haksolok ho raan karau no bibi sira nian, liuliu se oferta ne’e halo ho liman sira foer ho maun-alin sira nia raan.
Iha pontu ida-ne’e, Papa Francisco halo krítika ba ema balun ne’ebé halo doasuan ba Kreda maibé ho “osan foer”. “Ha’u hanoin benfeitór ruma Kreda nian, ho oferta di’ak, maibé oferta ne’e rezultadu husi esplorasaun hasoru ema, trata aat, halo sai atan ho serbisu la selu loloos. Ha’u dehan ba ema sira-ne’e: lori fila imi nia xeke, sunu tiha. Maromak nia povu, katak, Kreda, la presiza osan foer, maibé fuan nakloke ba Maromak nia mizerikórdia”.
Aman domin-na’in ne’ebé la renega nia oan sira
Reflesaun katekeze nian mai husi leitura livru profeta Isaías nian, iha-ne’ebé Maromak, nu’udar aman domin-na’in no atentu, dirije ba Israel hodi akuza nia ho infidelidade no korrupsaun atu lori hikas nia ba dalan justisa nian.
“Maromak liuhusi profeta, ko’alia ba povu ho fuan kanek nu’udar aman ida ne’ebé deziludidu : nia halo nia oan sira sai boot no oras-ne’e sira rebela hasoru nia”. Maski kanek, Maromak husik domin ko’alia no apela ba nia oan sir ania konxiénsia atu sira moris hi’as, Amu-Papa esplika. Ida-ne’e mak aman sira nia misaun edukativa, halo oan sira sai boot iha liberdade, responsavel, iha kbiit atu halo hahalok di’ak ba an rasik no ba ema seluk, Maibé tanba salan, liberdade sai pretensaun autonomia no orgullu nian, Papa Francisco resalta, tanba ne’e mak Maromak apela ba nia povu nia konxiénsia.
“Maromak nunka renega ita, ita mak ninia povu. Mane aat liu, feto aat liu, ema aat liu husi povu mak nia oan. No Maromak mak ida-ne’e: nunka renega ita! Nia hateten nafatin: ‘oan, mai. No ida-ne’e mak ita-nia Aman nia domin; mizerikórdia Maromak nian. Iha aman ida hanesan ne’e fó esperansa mai ita, konfiansa”.
Amu-Papa enfatiza katak iha-ne’ebé rejeita Maromak la iha moris ne’ebé posivel, maibé momentu ne’e susar ne’e mós akontese ba ema nia salvasaun: nia fó provasaun atu povu esperimenta laran susar ranba husik Maromak. “Terus, konsekuénsia evita-laek ba desizaun autodestrutiva, tenke halo sala-na’in reflete atu loke nia ba konversaun no perdaun (…) Ne’e mak salan mizerikórdia divina nian”.
