Katekeze ho Papa Francisco- 3 Setembru 2014
Sarani ida la’ós oan-kiak, basá nia hetan iha Kreda no iha Maria inan ida. Ne’e mak sínteze Papa Francisco nia reflesaun nian, ne’ebé iha katekeze ohin 3 Setembru, reflete kona-ba aspetu maternál Kreda nian, ne’ebé soi nu’udar modelu, Virjen Maria.
Asesu Katekeze ho lia-portugés
Kreda nia maternidade, Papa Francisco hateten, mak kontinuidade maternidade Maria nian, nu’udar ninia prolungamentu iha istória. “Hodi hateke ba Maria, ita deskobre Kreda nia oin furak no midar. Hodi hateke ba Kreda, ita rekoñese trasu aas liu Maria nian. Maibé ita sarani sira la’ós oan-kiak. Ita iha inan ida. Ita iha inan. No ida-ne’e kmanek tebes. Ita la’ós oan-kiak. Kreda mak inan, Maria mak inan”.
Amu-Papa esplika katak Kreda mak inan tanba nia hahoris ema ida-idak iha batizmu no husi ne’e sarani sira buras iha fiar ho Maromak ni aLiafuan nia kbiit. Kreda nia maternidade esprime ho modu partikulár iha servisu evanjelizasaun nian, basá hatudu nia nu’udar inan ida ne’ebé preokupa atu fó ba nia oan sira ai-han espirituál ne’ebé haburas vida sarani. Tanba ne’e duni mak, ema ida-idak simu bolun atu hakohak Maromak nia Liafuan ne’ebé Kreda propoin.
“Maromak nia Liafuan de’it mak iha kapacidade atu nakfilak ita iha nprofundu. Maromak nia Liafuan iha kbiit ne’e. No sé mak haraik mai ita Maromak nia Liafuan? Inan Kreda. Nia fó han ita husi ki’ik kedas ho Liafuan ne’e. No hanorin ita mori stomak ho Liafuan ne’e. No ida-ne’e kmanek tebes. Inan Kreda mak, ho Maromak nia Liafuan, nakfilak ita husi laran”.
Amu-Papa Francisco destaka katak Evanjellu no sakramentu sira orienta hilin sira moris nian. Hasoru perigu mundu nian, Kreda defende nia oan sira ho barani inan ida nian no husu atu ita sai vijilante hasoru babeur aat sira.
“Kreda iha barani inan ida nian ne’ebé hatene defende nia oan rasik husi perigu sira, ne’ebé mai husi satanás nia prezensa iha mundu, atu lori nia bá enkontru ho Jezús. Inan ida sempre defende nia oan sira. Defeza ne’e konsiste mós iha ezortasaun ba vijilsia: matan moris hasoru lia-bosol no babeur malignu nian. Basá maski Maromak manán tiha ona satanás, nia mai fali nafatin ho ninia tentasaun sira hanesan leaun ne’ebé hakilar iha ita-nia sorin atu han ita”.
Hodi fó hanoin katak Kreda la’ós de’it kleru, maibé batizadu hotu, Papa Francisco taka nia katekeze hodi husu ba Maria atu hanorin sarani sira atu banati tuir ninia solisitude ba maun no biin-alin sira nia di’ak, ho kapasidade sinsera atu simu, perdua no habelar barani no esperansa.
Nia mós enkoraja sarani sira ne’ebé ema persege katak Kreda nu’udar inan sente orgullu ho sira: “Ha’u hakarak asegura, espesialmente ba sira ikus ne’e, katak sira ne’ebé la iha defeza no hetan persegisaun, ha’u nia prosimidade: imi hela iha Kreda nia fuan laran; Kreda terus ho imi no orgullu ho imi, orgullu atu iha an sira hanesan imu’ imi mak ninia kbiit; imi mak ninia sasin konkretu no auténtiku ba ninia mensajen salvasaun nian, perdaun nian no domin nian. Ha’u hakohak imi hotu! Na’i haraik bensan ba imi no proteje imi hotu.”
