Dili – Husi Novembru 2021 depoizde rejistra iha #LaudatoSiActionPlatform no halo avaliasaun, komunidade Eusebia Palomino, Eskola Maria Auxiliadora no OPIAM halo planu oinsá atinje objetivu hitu Laudato Si’. Objetivu hitu ne’e mak: resposta ba rai nia hakilar; resposta ba ema kiak nia hakilar; ekonomia ekolójika; adopta estilu moris sustentavel; edukasaun ekolójika; espiritualidade ekolójika; resiliénsia no empowerment komunidade nian.
Komunidade Edukativa deside atu halo to’o aba obetivu sira-ne’e liuhusi atividade oioin hanesan: hatama matéria ambiente nian iha lisaun sira; iha eskola, loroloron depoizde rekreiu fó minutu lima ba limpeza; hapara uzu plástiku ne’ebé labele resikla; prepara tanke ba bee foer hodi uza ba rega planta sira; prepara estrume orgániku; promove no uza produtu lokál; orasaun hamutuk liga ho ekolojia; tulun ema vulneravel sira; hala’o sábadu ekolójiku ne’ebé propoin husi dioseze; kuda aihun sira iha área risku ba rai-halai no inundasaun.
Nune’e mak, iha loron 5 Marsu 2022, grupu OPIAM Maria Auxiliadora nian, hamutuk ho Ir Jacinta Gusmão, Ir Martinha Gomes no Ir Laura Pompeia, bá kuda ai-hun hamutuk tolunulu-resin-haat iha foho sira iha área Via-Sakra parte Comoro nian. Ema ida lori ai-hun no ida lori bee, atu depoizde kuda bele rega kedas, tanba udan la tau iha tempu ne’e, maski sei estasuan udan nian. Labarik no adolexente sira haksolok tebes bele halo asaun ida-ne’e hamutuk, atu hatudu kuidadu ba natureza, ba ita-nia inan rai. Sábadu ne’ebé mai, OPIAM sira sei ba fali atu rega ai-hun sira-ne’e, atu nune’e bele duni moris no sai boot.
(JG)
