RV – Iha katekeze kuarta, 18 Marsu, Amu-Papa Francisco kontinua tema família nian no, iha loron ne’e nia dedika ba labarik sira. Amu-Papa hateten katak labarik sira mak don ida ba umanidade, maibé, dalarumma, ema esklui sira, basá, la husik sira moris.
Papa Francisco hahú hodi halo relasaun entre labarik sira no Maromak, hodi destaka katak labarik sira la iha problema atu komprende Na’i. Hafoin nian destaka katak ema sira kontinua lori sira-nia identidade oan nian, maski sai boot ona eh katuas-ferik ona.
“Ksolok atu sente katak iha idade ida-idak moris nian, iha situasaun ida-idak, iha kondisaun sosiál ida-idak, it akontinua sai oan. Ne’e mak mensajen prinsipál ne’ebé labarik sira fó mai ita, ho sira-nia prezensa”.
Amu-Papa temi mós rikusoin ruma ne’ebé labarik sira lori ba umanidade, ho sira-nia matan konfiante no moos hodi hateke ba realidade, konfiansa espontánea iha inan-aman sira no fuan ne’ebé la toos. Labarik sira mós iha kapasidade atu simu no fó ternura, hamnasa no tanis.
Iha konkluzaun, Papa Francisco fó hanoin mós katak labarik sira mós konserteza lori preokupasaun no problema sira, maibé di’ak liu ba sosiedade ho preokupasaun sira ne’e duké sosiedade ida triste no malahuk, tanba la iha labarik sira.
“Bainhira ita haree katak índise moris nian iha sosiedade ida iha de’it 1%, ita bele dehan katak sosiedade ne’e triste, malahuk, tanba la iha labarik sira”.
Francisco fó sai tiha ona katak katekeze semana oin nian, nia sei ko’alia kona-ba kanek ruma ne’ebé halo aat ba infánsia.
