RV – Iha audiénsia jerál, 25 Maiu 2016, Amu-Papa halo reflesaun ida kona-ba orasaun nu’udar fonte mizerikórdia nian.
Hodi foti inspirasaun husi ai-kanoik feto-faluk no juiz laran-aat, Papa Francisco fó hanoin katak iha finál, feto-faluk nia perseveransa manán tiha juiz aat ne’ebé la iha interese.
“Halo di’ak mai ita atu hanoin ida-ne’e ohin”, Amu-Papa enfatiza, bainhira dehan katak ai-kanoik soi hanorin ida importante: “Nesesidade atu harohan nafatin, hodi la sai malirin. Tanba ne’e, la’ós kestaun harohan dalaruma, bainhira ‘ha’u sente’. Lae. Jezús dehan katak presiza harohan nafatin, la para”.
Papa Francisco afirma katak kontráriu ba juiz dezonestu, Maromak atende kedas nia oan sira, maski ida-ne’e signifika katak nia la halo iha tempuu no tuir maneira ne’ebé ita gosta.
“Orasaun la’ós ‘varinha mágica’, la’ós ‘varinha mágica’ ida. Orasaun tulun konserva fiar iha Maromak no tulun ita saran an ba Nia maski ita la komprende ninia vontade. Kona-ba ne’e, Jezús ne’ebé harohan maka’as mak ezemplu ida mai ita”, Amu-Papa dehan.
Papa Francisco argumenta katak, ita bele hanoin katak Maromka la rona nia Oan nia orasaun, basá Kristu mate iha krús. Maski nune’e, hodi temi Surat ba Ebreu sira, Amu-Papa fó hanoin katak “Maromak salva tebes Jezús husi mate hodi hariak ba Nia vitória kompleta husi mate, maibé dalan atu manán nia mak tenke liu husi mate duni”.
Amu-Papa esplika katak iha oorasuan iha To’os Oliveiras, Jezús entrega an tomak lahó rezerva ba Aman. No husi momentu ne’ebá, buat hotu muda.
“Objetu orasaun nian pasa ba segundu planu; buat ne’ebé importante mak uluknanai relasaun ho Aman. Ne’e mak buat ne’ebé orasaun halo: nakfilak hakaran no modela tuir Maromak nia vontade, maski vontade ne’e sá loos, basá ema ne’ebé harohan hakarak, iha fatin dahuluk, sai ida de’it ho Maromak, ne’ebé Domin mizerikordiozu”, nia esplika.
Atu remata, Papa Francisco resalta katak ai-kanoik taka ho pergunta importante ida: “Maibé bainhira Mane Maksoin fila, nia sei hetan fiar iha rai?”
“No ho pergunta ida-ne’e, ita hotu matan moris bá: ita labele deziste husi orasaun maski la hetan resposta. Orasaun mak konserva fiar, lahó nia fiar namlele”, Amu-Papa remata.
