Iha loron sira Vizita Canonica Madre Provincial nian iha komunidade Cassa, madre fo nia tempu hasoru destinatario sira apostoladu comunidade nian hanesan: Colaboradores, OPIAM, no grupo oratoriano sira (Magone, Madre Mazzarello, Don Bosco, Laura Vicuña, Domingos Savio no Maria Auxiliadora).
Iha 13 de Dezembro 2022
Iha loron daruak Vizita Canonica nian Madre Provincial hasoru kolaboradora sira: Familia sira haksolok no agradese ba Madre Alma tanba ita (irman FMA) sira nia prezensa iha iha sira nia leet. Madre nia dialogu ho sira hahu ho pergunta ida: imi hakarak saida mak ami bele halo iha fatin ida ne’e? Familia sira sujere: iha tempu forte sira Quaresma-Adventu no fulan Maio madre sira bele ba fo formasaun iha bairu sira no Se iha possibilidade loke kursu ruma ba foinsa’e no inan sira. Iha loraik depois de selebrasaun Eukaristia madre Alma mos hasuru malu ho padre Paroco pe. Armindo Brito.
Iha 1 4 de Deembro 2022
Labarik sira ho entusiasmu nakonu ho ksolok hodi simu no agradese ba madre Provincial liu husi sira nia hananu no dansa sira. Iha oportunidade ne’e Madre Provincial hato’o nia mensajen ba labarik sira: Hau apresia liu imi nia ksolok ne’ebe hatudu iha momentu ida ne’e, hau husu imi atu hatudu mos ksolok ida ne’e iha familia laran maski dala ruma inan-aman sira husu imi atu halo buat ruma ne’ebe todan liu imi nia hakarak no kapasidade sira, justu ida n’ee mak imi tenki haksolok liutan tanba Maromak iha imi nia fuan laran nune’e imi tenki lori domin no dame iha uma laran. Hau mos konvida imi atu sai hanesan anju iha familia laran iha tempu Adventu ida ne’e hodi konvida no lori imi nia familia sira atu ba hasoru ksolok nia Na’in ne’ebe sei mai iha Natal no halo imi nia ksolok ida ne’e sai naroman ne’ebe leno imi nia familia tomak.
Iha kalan ami irman sira iha komunidade ho fuan nakonu ho gratidaun agradese ba Madre Alma nia vizita iha ami nia le’et maski momentu badak maibe prezensa ne’ebe nakonu ho grasa. Ami agradese ba madre nia domin, disponibilidade, pasiensia no sakrifisiu nu’udar inan mai haree ho matan ami nia realidade misaun nian iha fatin ida ne’e. Ho domin no gratidaun ami hananu knananuk Maria nian ba Madre nu’udar ami nia orasaun no agradesimento ba madre nia prezensa iha ami nia komunidade.
Obrigada wain Madre Alma doben!
(FMA Cassa – Domingas da Silva FMA)
