Vizita Kanónika
Venilale – Iha loron 18 to’o 23 Marsu, Inspetora FMA Timor no Indonézia nian Ir. Alma Castagna FMA, halo vizita kanónika ba irmán sira iha komunidade Madre Mazzarello Venilale. Nune’e Irmán sira hamutuk ho komunidade edukativa no estudante Tékniku Vokasionál Madre Mazzarello, simu Madre Provinsiál ho Tebe-Dai.
Vizita kanónika mak knaar Inspetora nian, iha ne’ebé halo vizita ba komunidade sira atu hare besik liután irmán sira-nia moris no misaun tuir karizma Saleziana. Nune’e iha loron dahuluk nu’udar introdusaun ba vizita ne’e madre Alma koalia ba irmán sira konaba Maria nia prezensa iha festa Kana no Don Bosco nia liafuan: “Maria La’o iha Uma ida ne’e”. Liafuan hirak ne’e husu mós ami atu Hakbesik ba foin-sa’e sira, Hela ho sira no Rona sira ho Amorevolezza Saleziana hanesan Maria halo iha festa Kana.
Hafoin iha loron Domingu iha dader madre Alma hasoru ADMA sira no loraik hasoru oratorianu sira husi sentru. Iha ne’e madre 
husu ba oratorianu sira atu kontinua reza ba maluk sira iha Ukraina atu bele hetan paz. Iha kalan, madre hasoru interna sira hodi rona sira no halo diálogu ho sira konaba atitude no karakter saida deit mak presiza iha atu bele serbisu hamutuk no moris hamutuk iha dame bazeia ba film RAYA and the last dragon. Hafoin madre fó lia menon ba interna sira katak moris hamutuk iha koléjiu ho ema barak presiza fiar malu, simu malu, halo planu hamutuk, serbisu hamutuk, haka’as an atu ida idak hala’o nia knaar ho responsabilidade ho nune’e deit mak ita bele kria dame no armonia. Buat diak oituan ne’ebé imi halo ninia efeitu boot ba ema seluk nia diak.
Nune’e mós iha loron tuir mai ba estudante ETV sira madre fó lia menon katak mehi ne’ebé imi iha ba futuru aban-bainrua nian hahu neneineik husi agora. Hafoin madre fó tempu ba estudante sira husu pergunta no sujestaun konaba eskola nian.
Iha loron hanesan madre Alma hasoru mós professor/a sira ETV nian hodi aprezenta mos kapitulu Jeral 24 nian. Hafoin dala ida tan madre fó tempu ba professor/a sira halo diálogu ho sira konaba eskola nian. Hafoin madre enkoraja sira atu kontinua laran manas ba sira-nia profisaun no hamutuk ho irmán sira preukupa ba foin-sa’e sira-nia futuru – sai sarani loos no sidadaun onestu.
Nune’e iha Tersa-feira loraik, ho fuan nakonu ho agradesimentu ami komunidade edukativa no estudante agradese ba Maromak ba prezensa madre Alma nia vizita iha ami-nia komunidade liu husi Eukaristia santa.
Nu’udar ami-nia gratidaun ba madre, ami espresa liu husi drama ne’ebé ho titúlu “Agradese ba: MORNESE ULUK, MORNESE OHIN NO MORNESE FUTURU” atu ami labele haluha grasa orijin nian no drama ne’e nu’udar preparasaun ba selebrasaun tinan 150 fundasaun Institutu nian.
Obrigada madre Alma, ba prezensa nu’udar inan no gia, agradese ba enkorajamentu ne’ebé hakbiit nafatin ami atu la’o ba oin ho korajen nu’udar feto konsagrada Saleziana hodi moris iha istilu sinodál no ho Amorevolezza Saleziana iha misaun ba foin-sa’e sira ho ema hotu ne’ebé ami hasoru.
(Alice Filipe FMA)
