𝑴𝒆𝒏𝒔𝒂𝒋𝒆𝒏 𝒑𝒂𝒓𝒂𝒃𝒆𝒏𝒔 𝒏𝒊𝒂𝒏 𝒉𝒖𝒔𝒊 𝑺𝒖𝒑𝒆𝒓𝒊ó𝒓 𝑱𝒆𝒓á𝒍 𝑰𝒏𝒔𝒕𝒊𝒕𝒖𝒕𝒖 𝑭𝒊𝒍𝒉𝒂𝒔 𝒅𝒆 𝑴𝒂𝒓𝒊𝒂 𝑨𝒖𝒙𝒊𝒍𝒊𝒂𝒅𝒐𝒓𝒂, 𝑴𝒂𝒅𝒓𝒆 𝑪𝒉𝒊𝒂𝒓𝒂 𝑪𝒂𝒛𝒛𝒖𝒐𝒍𝒂, 𝒃𝒂 𝑺𝒐𝒍𝒆𝒏𝒊𝒅𝒂𝒅𝒆 𝑰𝒎𝒂𝒌𝒖𝒍𝒂𝒅𝒂 𝑲𝒐𝒏𝒔𝒆𝒊𝒔𝒂𝒖𝒏 𝒅𝒆 𝑴𝒂𝒓𝒊𝒂 2025.

Iha okaziaun Solenidade Imakulada Konseisaun Maria 2025 nian, Superiora Jerál Institutu Filhas de Maria Auxiliadora, Madre Chiara Cazzuola, haruka mensajen parabens nian ba FMA sira hotu no Komunidade Educativa sira:

Iha klima misionária nian ne’ebé ita moris daudaun iha tempu ida ne’e, inspiradu no orientadu mós husi Santa Maria Troncatti nia kanonizasaun, husi selebrasaun sira foin lalais ne’e iha Torino no Génova ita-nia Maun-alin Salezianu sira-nia espansaun Misionária dahuluk nian, no iha tinan dahuluk preparasaun nian ba tinan 150 Partida Misionária Dahuluk Institutu nian, ha’u hakarak sublinha mensajen ida-ne’e iha aspetu misionária Mariana ita-nia vokasaun nian. Ita mak Maria Auxiliadora nia Oan-Feto sira, Institutu ida tomak Maria nian, ne’ebé hakarak ita atu kontinua prezente ativamente iha ita-nia moris. Ba ita, nia mak Matadalan ne’ebé uluk ba ita no akompaña ita iha ita-nia viajen.

Ha’u hanoin signifikativu atu hanoin hikas fali pasajen ida ne’ebé furak liu iha Krónistoria. Haktuir kona ba iha tempu dadeer ida iha loron 14 fulan-novembru tinan 1877. Don Bosco, rona tiha misionáriu sira-nia konfisaun no ho tempu selebra mos misa, akompaña ho madre Mazzarello, irman sira no salezianu sira to’o portu Jenova nian.

Bainhira to’o iha fatin embarkasaun nian, sira mós sa’e ró (Cronistoria II 289 ff). Don Bosco no Madre Mazzarello emosionante ho afetu, ho fuan ida aman no inan nian, la’o liuhusi kabina sira atu haree oinsá madre no salezianu sira hetan akomodasaun. Bainhira sira nia kompañeiru tenke sai hosi ró, despedida ne’e konserteza halo ema laran-kanek. Kronistoria relata detalle barak ne’ebé maka ha’u sei la ko’alia agora, maibé iha pontu ida, bainhira ró ne’e sai, husi tasi rona lian husi laloran: Don Costamagna ne’ebé akompaña koru ho pianuforte “Ha’u hakarak hadomi Maria, ha’u hakarak fó ha’u nia fuan ba nia”. Knananuk ida-ne’e lori dook bainhira ró sai hosi portu… “Ha’u hakarak hadomi Maria, ha’u hakarak fó ha’u nia fuan ba nia” maka knananuk ida ne’ebé Don Costamagna kompoin iha Mornese ba madre sira, no interesante atu lee oinsá ida-ne’e mosu. Nia kompoin iha sakristia, iha-ne’ebé nia ensaiu no ensaiu, liuliu nota dahuluk sira, ne’ebé subliña “Ha’u hakarak hadomi Maria…”, no nia labele bá dook liután.

Uma ne’e nakonu ho lian ida-ne’e, to’o iha laboratóriu ema ida labele rona malu ona nein hasa’e lian. Depois Madre Mazzarello, ne’ebé serbisu no ko’alia ba postulante sira no novisia sira, ita troka fatin barak ona, maibé rona nafatin refrão ida ne’e “Ha’u hakarak hadomi Maria…”. Ikusmai, ho hamnasa midar, nia hateten: ” Imi bá dehan ba Diretór katak la’ós de’it nia mesak hadomi Na’i-Feto, maibé katak ami mós hakarak hadomi nia, no katak nia tenke sai di’ak.”

Nune’e, ba misionáriu dahuluk sira, knananuk ne’e liga ba memória Mornese nian, no interesante katak madre sira hananu elojia ida-ne’e bainhira sira husik sira nia rai, sira nia família, sira nia Fundadór sira, iha momentu ida separasaun boot nian. Sira husik Don Bosco no Madre Mazzarello, sira husik hela esperiénsia serta ida atu hasoru esperiensia foun.

Protagonista momentu ida-ne’e nian mak dala ida tan Maria, Inan no Mestra. Nia ne’ebé apoia, konsola, no enkoraja. Karik liafuan sira-ne’e, “Ha’u hakarak hadomi Maria, ha’u hakarak fó ha’u-nia fuan ba nia”… bele sai romántiku ba ita, maski ko’alia iha linguajen sékulu XIX nian, maibé mai ita profunda liután: Maria mak ida ne’ebé guia viajen no akompaña. Laiha ita nia uma ka Inspetoria ida ne’ebé maka la planu no la mai uluk husi Maromak nia Inan no ita nia Inan. Nia envolve ho ternura boot ema ida-idak, komunidade edukativa ida-idak, atividade no projetu hotu-hotu ne’ebe lori ba di’ak.

Ha’u hanoin katak iha Solenidade Imakulada Konseisaun nian, ita bele vizita fali ita-nia irmán sira-nia esperiénsia furak: Maria prezente iha irmán foin-sa’e sira ne’ebé sai ba misaun, Maria la’o uluk ba sira iha sira-nia viajen ba Amérika iha-ne’ebé nia hein nia Oan-Feto sira. (…)

Ida ne’e bele sai nu’udar faktu kronaka nian, no ita bele para oituan iha ne’e. Maibé knananuk ida-ne’e, hanesan deskreve iha ita-nia Krónistoria, ” nia lakon iha laloran…” ka di’ak liu, “laloran nian lian ida mai hosi tasi…” Ita hatene katak laloran ne’e maka dinamizmu, movimentu, laloran ida ne’ebé nia rohan la hatene, no laloran ida-ne’e namkari iha tasi hamutuk ho ita-nia serbisu misionária… laloran ida ne’ebé lori Maria nia naran, deklarasaun ida, laos deit sabor ba memória ida, husi esperiénsia ida ne’ebé importante tebetebes ne’ebé liga ita ba ita-nia Institutu nia orijen, maibé reflesaun ida ba loron ohin.

Ita hotu kaer kona ona laloran ida-ne’e, ne’ebé halian nafatin iha ita-nia laran no fó hanoin mai ita kona-ba Maria nia prezensa iha ita-nia moris, iha ita-nia misaun. Laloran ne’e evokativu; hanesan ita bele rona espresaun ida-ne’e nia kbiit ne’ebé lian iha ita-nia tilun: ba ita, ida-ne’e maka serteza ida ne’ebé fó kmaan ba ita no tulun ita atu haree ba futuru ho esperansa no konfiansa.

Iha Solenidade Imakulada Konseisaun nian ida-ne’e, mai ita fila ba nia, veneradu husi inísiu iha Valdocco no Mornese nu’udar Imakulada Tulun-Na’in sarani sira-nian, feto vitória nian, ne’ebé tau matan ba Kreda no umanidade tomak no halakon buat aat ba nafatin, atu nia mós haraik mai ita korajen atu halo hilin misionária no lori dame no esperansa ba mundu.

Iha momentu importante ida-ne’e, ita sente iha komuñaun ho Família Saleziana tomak, liuliu iha Sírkulu Mariana.