Iha Angelus iha Prasa S. Pedro, Amu-Papa esplika katak “Jezús nia mai iha frakeza isin umana nian” konvida ita atu fila ba Maromak liuhusi umanidade. Tanba ne’e, atu moris fiar inkarnada ida, atu «hanoin, harohan, no haklaken» Maromak ida ne’ebé la’ós «dook» maibé «prezente iha ita-nia maun-alin sira-nia oin», ne’ebé «hatudu an iha situasaun loroloron nian», no hakbesik ba ema seluk, hodi kompromete an konkretamente «iha promosaun fraternidade no komuñaun nian».
Ida-ne’e mak Maromak nia obra: iha Jezús, Nia halo an sai ita ida, Nia hili atu hamutuk ho ita, Nia hakarak sai Maromak-ho-ita ba nafatin. Jezús nia mai iha frakeza isin umana nian, enkuantu hamoris fali esperansa iha ita, fó mós mai ita kompromisu rua: ida ba Maromak no ida seluk ba umanidade.
Loron rua antes konkluzaun Jubileu Esperansa nian, ne’ebé sei konklui ho taka Odamatan Santa Bazílika Vatikanu nian, iha Angelus, Leão XIV fó hanoin ba sarani sira kona ba “fundamentu” esperansa kristaun nian mak “inkarnasaun Maromak nian” no la’ós fiar-na’in optimista ba sira-nia esperansa previzaun sira ka kálkulu umanu sira, maibé iha Maromak nia hilin atu fahe” viajen umanidade nian, atu nune’e sira “nunka mesak iha viajen moris nian.”
Ba Maromak no ba umanidade
No hahú loloos husi Jezús, Maromak halo-An ba ema, Amu-Papa oferese programa ida ba moris: hakbesik ba Maromak, la hare ba distansia, maibé haree Nia iha ema seluk, iha akontesimentu sira moris loroloron nian, no kompromete an ho konkretu ba maun-alin, “justisa”, “dame” no “tau matan ba sira ne’ebé vulneravel liu”.
Fiar ida ne’ebé enkarnadu
Maromak “hili ita-nia frajilidade umana nu’udar nia horik-fatin”, tanba ne’e maka ita hetan konvite atu fila fali ba Nia, atu hanoin filafali Nia la’ós hosi “doutrina abstrata ida”, maibé hosi “Jezús nia isin”.
Ita tenke ezamina nafatin ita-nia espiritualidade no dalan sira iha-ne’ebé ita espresa ita-nia fiar, atu sira sai inkarnadu duni, bele hanoin, reza no haklaken Maromak ne’ebé mai hasoru ita iha Jezús: la’ós Maromak ida ne’ebe dook ne’ebe hela iha lalehan perfeitu iha leten as ba, maibé Maromak ida ne’ebe besik hela ita iha ita-nia rai ne’ebe frajil, ne’ebé halo an prezente iha nia maun-alin sira nia oin, ne’ebé revela nia-an iha situasaun loroloron nian.
Promove Fraternidade no Komuñaun
Nomos, tanba Maromak “sai ona ida husi ita, kriatura umana hotu-hotu maka reflesaun ida husi Nia,” “lori iha nia laran Ninia imajen, prezerva sintila ida husi Ninia naroman.” Tanba ne’e, kompromisu atu fila fali ba umanidade, ne’ebé Kristu husu ita, tenke lori “ba rekoñesimentu iha ema ida-idak nia dignidade inviolável no ba pratika domin resiproka ba ema seluk.”
Enkarnasaun ezije mós mai ita kompromisu konkretu ida atu promove fraternidade no komuñaun, atu solidariedade sai kritériu ba relasaun umanu, ba justisa no dame, ba kura sira ne’ebé vulneravel liu no defeza ba sira ne’ebé fraku. Maromak sai isin, tanba ne’e la iha adorasaun auténtiku ba Maromak lahó kura ba isin umana.
Ksolok Natál nian tenke sai enkorajamentu ida atu kontinua “viajen” ida-ne’e, konklui Papa Leão XIV, ne’ebé invoka Virjen Maria atu halo ema hotu “prontu liután atu serbí Maromak no maluk sira”.
Fonte: Vatican News
