“Lisensa, obrigadu no deskulpa”. Ne’e mak liafuan xave sira Papa Francisco nia katekeze nian, iha kuarta, 13 Maiu. Husi oin ba oin, Papa Francisco nia reflesaun semanál iha Prasa S. Pedro sei tau iha foku vida loroloron família nian.
Nia kontinua ninia reflesaun preparatória ba Sínodu Família nian, iha fulan Outubru, hodi ko’alia filafali kona-ba “edukasaun di’ak”.
Amu-Papa hahú ho liafuan “lisensa”. Nia dehan katak tama iha ema seluk nia moris, maski halo parte ita-nia an rasik nian, husu delikadeza komportamentu nian ne’ebé la invade ema.
“Intimidade la autoriza atu ita hanoin buat hotu loos. Hetok sai íntimu liu no kle’an liu domin, hetok ezije liután respeitu liberdade nian no kapasidade atu hein atu ema seluk loke nia fuan nia odamatan”.
Liafuan daruak, “agradese”, tuir Amu-Papa, dalabarak, iha sivilizasaun atuál ne’e ema hanoin “agradese” hanesan fali sinál frakeza nian. Ema ne’ebé liafuan mamar no hatene agradese, ema hanoin ema ne’e fraku.
“Ita keta laran rua-rua iha edukasaun ba gratidaun: ema nia dignidade no justisa sosiál liu husi ne’e. Se vida familiár la valoriza estilu ne’e, vida sosiál mós sei lakon nia. Gratidaun, ba ema ne’ebé fiar, horik iha fiar nia sentru: sarani ida ne’ebé la hatene agradese mak ema ida ne’ebé haluha Maromak nia linguajen”, Amu-Papa repete dala rua.
“Husu deskulpa”, liafuan difisil, maibé nesesáriu liu, Amu-Papa afirma, hodi temi orasaun “Ami Aman”: Haraik perdua mai ami salan nu’udar ami perdua ba ema halo aat ami”.
“Se ita la iha kapasidade atu husu deskulpa, ita la iha kapasidade atu perdua. Iha uma sira ne’ebé la husu deskulpa, kuran ár no loke kanek sira. Iha moris kazál nian mós dala barak istori malu, maibé Papa Francisco nia konsellu nafatin hanesan: keta remata loron hodi la halo dame; no ba ne’e, natón de’it jestu simples ida; karik hamaus ida, lahó liafuan sira…”.
Atu remata, Papa Francisco repete fila fali katak “liafuan tolu ne’e simples liu to’o halo ema hamnasa, maibé bainhira ema haluha, la’ós engrasadu ona eh la halo ona em ahamnasa..
“Atu Na’i tulun ita tau liafuan sira-ne’e iha fatin loos, iha ita-nia fuan, iha ita-nia uma no mós iha konvivénsia sivíl”.
