Soibada – Dioseze Baucau iha ninia planifikasaun pastorál buka atu fortifika sarani sira nia fiar hodi haburas mós sentidu pertensa ba Igreja liuhusi formasaun. Nune’e mak iha loron 19-21 Abríl, animadór akólitu sira husi parókia 24 nian halibur hamutuk iha parókia Soibada atu estuda no reflete “knaar akólitu sira-nian iha selebrasaun litúrjika.
Objetivu espesífiku soru-mutu ne’e nian mak haree hamutuk formasaun akólitu sira nia knaar iha selebrasaun litúrjika; haree jestu sira, hatais no atitude akólitu sira-nian; fortifika animadór/a sira nu’udar formadór/a no giadór/a ba akólitu sira no husi ne’e hetan ritmu ida, maneira ida no kór ida ba akólitu tomak iha dioseze laran. Tuir vizaun dioseze nian, akólitu sira ne’e mak sei sai fini di’ak ba vokasaun oioin iha Kreda, sai lider iha sosiedade no Kreda, tan ne’e mak grupu akólitu sira ne’e hanaran “akólitu vokasionál”.
Partisipante sira hamtuk atus ida no kongresu ne’e nia motor mak vigararia episkopál ba asuntu pastorál sira, ne’ebé ninia vigáriu mak Pe. Arlindo Sequeira. Iha loron haat ne’e nia laran sira hetan formasaun husi oradór eh fasilitadór Pe. Alípio Pinto kona-na “Eukaristia nu’udar kultu hotu nia hun loloos” no “knaar akólitu sira nian iha selebrasaun litúrjika sira”. Fasilitadora seluk mak Ir Jacinta Gusmão FMA, ne’ebé hato’o tema kona-ba “Funsaun animadora iha akólitu vokasionál”. Ir Jacinta mós fó nia kontributu ba pontu ruma kona-ba lideransa no organizasaun iha grupu akólitu sira nian no fasilita diskusaun sira.
Durante enkontru, animadór/a akólitu sira fahe ba grupu haat atu bele identifika kestaun ruma ne’ebé mosu iha akólitu sira-nia moris: espiritualidade akólitu nian; jestu no prátika iha selebrasaun litúrjika; aprezentasaun esteriór no veste sira no organizasaun no lideransa iha grupu akólitu nian. Husi diskusaun ne’e, no depoizde konsulta ho peritu seluk, sekretariadu akólitu diosezanu sei elabora manuál ida ba akólitu sira atu nune’e bele sai matadalan konkretu ba sira, iha nivel espirituál no servisu nian ba Kreda, liuhusi ajuda iha selebrasaun litúrjika sira. Mini-kongresu lider sira-nian ne’e nu’udar preparasaun ba kongresu akólitu sira-nian ne’ebé sei hala’o iha fulan Agostu nia laran.
Prezente iha ekontru ne’e Vigáriu Jerál dioseze Baucau ba abertura, diákonu diosezanu na’in lima, Irmaun Salezianu ida no Irmán na’in neen. Husi FMA, aleinde Ir Jacinta Gusmão, Ir Josefa Boavida mós prezente nu’udar ida-ne’ebé tau matan ba konsumu.
