Comoro/Dili – Iha 2 Abríl 2022, Irmán Perpétua sira na’in 45 husi komunidade Fuiloro, Laga, Venilale MA, Venilale MM, Baucau, Dili Komunidade Eusebia, S.José, Balide, Divina P. no Komunidade Cassa, halibur hamutuk ba formasuan kona-ba Liña-gia kona-ba FMA nia prezensa iha rede sosiál.
Molok hahú enkontru, iha loke ho orasaun badak ne’ebé diriji husi Irmán Esmeralda Soares, FMA, hafoin tuir mai lia maklokek husi Madre Alma Castagna, FMA ho lia menon ba Irmán Perpétua sira ne’ebé dehan katak “prezensa “ mak kategoria importante KJ XXIV husu, prezensa kualifikada no kompetente iha rede sosiál mós, nu’udar misaun edukomunikativa Institutu nian.
Hotu tiha lia-menon husi Irmán Alma kontinua kedas ho Sr. Jacinta Gusmão, FMA ne’ebe ko’alia kona-ba livru orientasaun FMA nia prezensa iha rede Sosial, foti introdusaun husi Madre Yvonne Reungoat: “Sai prezente iha rede Sosial sira mak resposta ida ba ita-nia vokasaun. Ita labele haluha katak ita mak edukadora sira no edukadora ba fiar, maklorik mensajen Evanjélika no karizmátika sira atu fahe ho ema sira pertense ba kultura lahanesan”.
Depoizde aprezenta realidade “onlife” ohin loron nian, Ir Jacinta husu ba Irmán sira atu hakle’an pergunta tolu hodi hateke ba an rasik no konfronta ho Liña-Gia sira: Tanba sá ita hola parte ba rede Sosiál sira? Oinsá ita hola parte ba rede Sosial? Sá loos konteúdu atu komunika?
Hafoin hodi fó hanoin fali kona-ba Manuál Komunikasaun Institusionál FMA nian, Ir Jacinta husu ba komunidade ida-idak atu hanoin kona-ba planu komunikasaun iha rede sosiál hodi hatán ba pergunta sira 5 W + H.
Entre sira-nia hilin, komunidade sira nia objetivu mak haklaken valór evanjéliku, karizmátiku no kultura, hodi fahe formasaun no informasaun. Destinatáriu sira la’ós de’it foin-sa’e sira, maibé mós família sira, antiga/u aluna/u sira no ema seluk ne’ebé asesu.
(Ekipa Comsoc)
