Loron aprofundimentu espiritualidade nian iha forum MJS

FORUM MJS 16-18 Setembru 2022

Loron 17 Setembru

Iha loron daruak nian ne’e, sei foka liu ba formasaun ba animadores sira. Ne’ebe sei fo husi Padre , Madre, no membro seluk familiaSalesiana nian. atividade husi dader nian mak hahu ho orasaun dader nian, Eukaristia Santa ne’ebé Preside husi Pe. João Soares, Pr. Presidente CNJTL. Iha omilia nia dehan: “Jesus ita atu sai rai ne’ebé  diak ba Nia liafuan. Tamba Evanjellu ba loron ida ne’e nian kona ba ‘Fini ne’ebé ema ida kari no monu iha fatin oi-oin’. Ita ida-idak presiza rekoñese ita nia-an, ita mak rai ida oinsa. Maromak loronloron koalia mai ita, oinsa liafuan sira ne’e kona hau? Koalia kona  rona, bele dehan joven sira rona liu ba buat ne’ebé sira gosta maibe ladun rona ba buat ne’ebé nesesario. Ezemplo ba joven mane sira, sinu Igreja nian ne’ebé besik nia uma nia larona maibe festa iha fatin do’ok nia rona; ba joven feto sira ema koalia liafuan hase nian (goja) iha dalan kona ba sira-an sira rona no dalaruma monu ba liafuan sira ne’ maibe Aman-inan nia konsellu diak sira sira la rona. Tempo ida ne’e mak osan mean, se ita hateke ba nia nia-an ita monu iha tipo rai fatuk, aitarak laran no dalan ninin, ita sei bele hakas-an atu sai rai diak, nune’e fini bele monu iha rai bokur. Sei iha tempo ba ita”.

Hafoin hahu ho konferensia kona ba Estreia Reitor Maior nian ne’ebé fahe tuir grupo. Grupo sira ne’e, ida-idak iha orador ida husi grupo familia Salesiana nian mak sei koalia ba sira kona ba Kapitulo ida-idak husi estreia Reitor Maior nian. tuir tan ida ne’e, Me. Angelita hato’o kona ba “saida mak Oratorio” , tuir tan Me. Alma hato’o kona ba “Jornada Mundial da Juventude (JMJ)” atu sensibiliza no prepara foin sa’e sira ne’ebé hakarak ba partesipa iha JMJ ne’ebé sei halao iha Portugal, tuir tan aprezentasaun kona ba resilkajen husi Novicio SDB sira, tuir tan Pe. Nelson hato’o kona ba “Saida Sínodo”. Atu tulun foin sa’e sira komprende kona ba servisu Santo Padre no Bispo sira nian ba Kreda universal nia diak.

Tuir tan iha sesaun “rona foin sa’e sira”, sesaun ne’e interanste tebes tamba foin sa’e sira hetan oportunidade atu hato’o sira nia hanoin no preokupasaun sira ba Salesiano no Salesiana sira ne’ebé prontu rona sira no hatan ba sira nia presiza. Tuir tan Sr. Natalino de Jesus husi CNJTL ne’ebé koalia kona ba “Sínodo Bispo sira nian” , atu foin sa’e sira hatene kona ba “Komuñaun, Partesipasaun no Sínodal. Tuir tan iha selebrasaun Penitensial ba foin sa’e sira. Furak tebes foin sa’e sira hetan oportunidade atu hakbesik ba Sakramentu Rekonsiliasaun atu konfesa sira nia sala ba Nailulik sira ne’ebé prontu ona hein sira. Ikus nian mak “orasaun Taize no sunu ahi klobor (api unggun) sinal roman nian ne’ebé foin sa’e sira simu liu husi Sakramentu Rekonsiliasaun no Orasaun hamutuk. Molok tama kalan kultur, iha Buona notte husi Me. Alma. Iha buona notte  ne’e Madre koalia kona ba Beato Artemide Zatti nia moris ne’ebé iha karateriska rua importante los iha nia moris mak: Senti Maromak nia domin ne’ebé kura nia husi moras TBC, nune’e nia sai Salesiano no halao kna’ar nu’udar enfermeru ida ne’ebé tau matan ba sira.

Loron 18 Setembru

Iha loron tuir mai ka loron ikus, hahu ho orasaun dader nian, hafoin halo avaliasaun ba atividade loron hirak ne’e nian, Misa enseramentu ne’ebé Preside husi Padre Provinsial. Buat ne’ebé Padre dehan iha omilia mak: “ita tenke sai Profeta lia los nian. Maromak bolu ita sai profeta no mestre atu fo sasin no sai santu. Imi joven sira simu bolu atu sai Apostulo ba joven sira seluk hodi fo testemunha fiar no lialos nian. Santa Teresa de Calcuta dahan: ‘laos ema hotu bele halo buat bo’ot maibe ema bele halo buat ki’ik sira ho domin ne’ebé bo’ot’. Nu’udar joven uza didiak materiais espiritual sira atu besik ba Maromak, sai ema los no diak. Imi mak joven sira ne’ebé nakonu ho esperansa”.

Hafoin iha seremonia koa kek selebra tinan 20 MJS nian, han meio-dia hamutuk, dahur hamutuk no fahe malu. Sira ne’ebé mai husi Munisipiu sira tenke fila sedu. Obrigada barak ba partesipasaun hotu no boa viagem. Ita hasoru malu fali iha Forum MJS tinan tuir mai.

Agradese wain ba Maromak ba memento osanmean ida ne’e, basá tinan rua kotuk labele realiza eventu furak ne’e tan Pandemia Covid-19, loron hirak ne’e bele realiza ho susesu no entuziasmo. Iha buat barak mak presiza hadiak tan maibe em geral partesipante hotu sente ksolok bo’ot halibur hamutuk fali nu’udar foin sa’e Salesianos ne’ebé nakonu ho ksolok salesiano nian. Agradese mos ba maluk sira hotu ne’ebé suporta no kontribui ona ba ami nune’e bele realiza atividade sira ho diak.

(Noemia de Deus, FMA no Nov. Esmeralda)