Dili – Hori uluk kedas sarani sira invoka Na’i-Feto ho títulu Maria Sarani sira nia Tulun liuliu iha tempu funu, ódiu, erezia, pesegisaun no iha difikuldade oioin nia laran. Títulu ida ne’e apropriadu ba nesesidade sarani sira nian. Maria nu’udar tulun-na’in hanesan iha Kaná, Nia nafatin atende ema nia presiza hodi lori no orienta ema atu hakbesik-an ba Jezús, hanesan buat ne’ebé nia dehan ba servente sira “Imi halo tuir buat ne’ebé Nia dehan”.
Hodi selebra solenidade Maria Auxiliadora nia, komunidade Balide halo preparasaun hahú kedas husi loron primeiru novena nian to’o dia 23 entre atividade hirak ne’e mós Irmán sira prepara labarik hamutuk 25 durante fulan lima ho balun nune’e sira prontu halo primeira komuñaun iha solenidade Maria Auxiliadora nian. Iha 23 loraik hahu husi tuku 2 to’o tuku 10 kalan iha velada ba Maria Auxiliadora ne’ebé hetan partisipasaun máxima husi eskola Kristal, bairru sira, komunidade Canossiana, viziñu sira no nakloke mós ba ema hotu ne’ebé iha devosaun ba Maria Auxiliadora. Ita bele dehan katak ema barak iha devosaun ba Maria Auxiliadora tanba maske kalan, distánsia dook ema barak mak partisipia balun mai ho família kompletu no joven balun mai ho sira nia grupu hodi reza no husu tulun ba Maria Auxiliadora.
Iha 24 loraik tuku 4 ema hotu mai konsentra iha komunidade atu halo prosisaun ho estátua Maria Auxiliadora ba iha parókia Balide atu misa. Ema barak mak partisipa iha prosisaun inklui família husi labarik sira ne’ebé atu simu primeira komuñaun. Prosisaun to’o iha parókia tuku lima no kontinua kedas ho misa solene ba Maria Auxiliadora ne’ebé prezide diretamente husi Amu pároku Balide nian, Pe. Adrianu. Iha nia omilia nia dehan katak Maria Auxiliadora la’ós de’it ba Família Saleziana maibé ba sarani hotu-hotu. Amu pároku mós fahe nia esperiénsia katak nia mós iha devosaun maka’as ba Maria Auxiliadora tanba iha tulun oioin ne’ebé nia simu hotu- hotu husi intersesaun Maria Auxiliadora nian. Iha omilia nia konvida sarani sira ne’ebé pretense ba parókia atu kuda devosaun ba Maria Auxiliadora tanba nia mak inan tulun-na’in ne’ebé tulun nafatin iha buat hotu. Nia mós husu ba madre sira atu tinan-tinan nafatin selebra festa ida ne’e iha parókia hamutuk ho sarani tomak hodi habelar devosaun ida-ne’e. Nia promete katak nia prontu atu kolabora ho madre sira atu bele haburas devosaun ba Maria Auxiliadora iha parókia refere. Nia mós agradese Irmán sira tanba fó tempu hodi prepara labarik sira atu halo sira nia enkontru primeiru ho Jezús iha loron espesiál ida-ne’e.
Ema hotu kontente partisipa iha misa ida depoizde simu bensan solene Maria Auxiliadora nian husi amu pároku ema hotu ne’ebé partisipa misa simu imajen Maria Auxiliadora nian ho orasaun konsagrasaun nian; ema hotu agradese tan bele partisipa no hetan bensan espesiál ida ne’e.
Nu’udar Maria Auxiliadora nia oan-feto sira ita iha obrigasaun atu habelar devosaun ida ne’e maibé atu hotu mós sai loloos monumentu moris agradesimentu nian ba ita Inan doben Maria Auxiliadora tuir ita nia fundador nia hakarak. Ita reza ba malu nafatin hodi husu bensan ba ita ida-ida nian an, ba ita nia inspetoria no ba ita nia institutu.
(Alexandrina Pinto)
