SASIN IDA BA FAMÍLIA SIRA IHA ENKONTRU MUNDIÁL FAMÍLIA NIAN
Inan aten-barani ida ne’ebé renunsia tratamentu moras atu bebé iha nia knotak la hetan perigu moris nian. Inan ida tinan 90 sira nian, moris iha parókia ida ne’ebé la dook husi Parco Nord, iha-ne’ebé ohin no aban Bento XVI sei hasoru família sira mundu nian Enkontru Munidál Família 2012 nian (30 Maiu-3 Juñu). Leiga ida no inan família nian iha ne’ebé ninia kauza beatifikasaun nian foin konklui iha nivel diosezanu (18 Maiu) no atu lori ba Roma ba Kongregasaun kauza santu sira-nian.
Maria Cristina Cella Mocellin nia belun sira husi Cinisello Balsamo mós tuir enkontru família nian, sira ne’ebé sai boot ho nia iha parókia ida dedika ba Sagrada Família, parókia ida-ne’ebé rai didi’ak hanesan fatuk-murak istória feto foin-sa’e ida, ne’ebé iha tinan ruma nia laran tan bele hetan onra altár nian hanesan Gianna Beretta Molla, ne’ebé João Paulo II proklama nu’udar santa.
Iha Sagrada Família Maria Cristina – klase 1969 – tuir oratóriu, sai boot ho Irmán sira Karidade Santa Giovanna Antida Thouret nian, nia mós sai katekista no animadora. Iha tinan ida – durante férias iha família nia uma iha Veneto – to’o ba nia momentu enkontru nian ho Carlo Mocellin no deskobre domin ida ne’ebé lori atu kompleta ninia dalan ho kazamentu iha loron 2 Fevereiru 1991 no ninia transferénsia ba Carpané, iha provínsia Vicenza nian. Iha-ne’ebá maka lalais kedas moris uluk Francesco no tuirmai Lucia; maibé iha 1994, durante isin-rua oan datoluk, ida Riccardo nian, tumór ida ne’ebé uluk kona-nia bainhira tinan 18 de’it, mosu filafali.
No iha ne’e maka nia halo hilin susar ida atu tau iha fatin dahuluk ninia oan nia moris. Katak sá signifikadu jestu ida-ne’e nian nia rasik haktuir iha surat ida ne’ebé, loron 24 Setembru 1995 iha ospitál Marostica nian, hatene ona kona-ba buat ne’ebé bele akontese (nia mate liutiha fulan ida), nia hakerek ba nia oan-mane foin fulan ruma de’it, no ohin loron adolexente. Testu ida ne’ebé vale liufali liafuan rihun ida.
«Riccardo doben- Maria Cristina konta -, ó tenke hatene katak ó la iha mundu ne’e purakazu de’it. Na’i hakarak atu ó moris biar mosu problema barak… bainhira ami hatene katak ó iha, ami hadomi no hakarak atu ó eziste ho ami-nia kbiit tomak. Ha’u hanoin fali loron ne’ebé doutór dehan katak nia diagnostika nafatin tumór ida iha rejiaun inguinál. Ha’u-nia reasaun mak ida atu repete dala barak: “Ha’u isin-rua! Ha’u isin-rua! Maibé doutór ha’u isin-rua!” Atu enfrenta ta’uk sira momentu ne’ebá nian ha’u simu forsa sukat-laek vontade boot nian atu soi ó. Ho ha’u-nia forsa tomak ha’u opoin atu renúnsia ó, to’o médiku komprende buat hotu no la dehan tan buat seluk».
«Nune’e, Riccardo, ó maka prezente ida mai ami – surat kontinua -. Iha kalan ne’ebá filafali husi ospitál, bainhira ó book an ba dala uluk ha’u sente hanesan ó dehan mai ha’u: “Obrigada mamá tanba ó hadomi ha’u!” No oinsá mak ami la hadomi ó? Ó maka kamurak ida, no bainhira ha’u hateke ba ó no haree ó bonitu loos, isin-moris, simpátiku… ha’u hanoin katak laiha terus iha mundu ne’ebé boot liu fali oan ida. Na’i hakarak hakonu ami ho grasa – ne’e liafuan ikus sira hakerek ba Riccardo -: ami iha oan na’in tolu furak liu ne’ebé ho ninia grasa bele sai boot hanesan Nia hakarak. Ha’u agradese Maromak basá nia hakarak haraik mai ami prezente boot ne’e, ami-nia oan sira. Nia de’it mak hatene oinsá ami hakarak tan oan seluk, maibé ba oras-ne’e imposivel duni».
Maria Cristina mate ho tinan 26 iha ospitál Bassano del Grappa nian iha loron 22 Outubru 1995. Dioseze Padova mak investiga ninia kauza beatifikasaun nian no halo parte ba nia parókia Carpané no Valstagna iha-ne’ebé moris família Mocellin to’o oras-ne’e. Maibé ligasaun ho Cinisello Balsamo kontinua forte: sira ne’ebé koñese nia hamoris Asosiasaun Amigu sira Cristina nian (Amici di Cristina) ne’ebé habelar figura ne’e nia memória. Iha mós sentru sasimuk nian ho Maria Cristina Cella nia naran atu tulun moris iha Saccolongo (Padova). Ne’e modu ida atu jestu sasimuk mamá Cella Mocellin nian bele hafoun fali iha inan barak ho oan sira seluk ne’ebé enfrenta difikuldade oioin.
