Regina Coeli – Papa Francisco
Maun no Biin-alin doben sira, bondia!
Domingu dahaat Páskua nian ne’ebé ita selebra ohin, dedika ba Jezús Bibi Atan Diak. Evanjellu dehan: “ Bibi sira rona Nia lian: Nia bolu nia bibi sira ho naran” ( Jo.10,3). Na’i bolu ita ho naran, bolu ita tan hadomi ita. Maibé Evanjellu mos dehan, iha tan lian seluk ne’ebé labele tuir: ema fuik, ahu-nain, naokten ne’ebé hakarak aat ba bibi sira.
Lian seluk ne’e nalian iha ita laran. Iha mos Maromak nia lian ne’ebé koalia mamar ba ita nia konxiénsia, no iha mos lian tentadór ne’ebé lori ba aat. Oinsá rekonese lian Bibi Atan Diak nian husi naokten nian, oinsa distingi Maromak nia inspirasaun husi buat aat nia sujestaun? Ita bele aprende atu discerne lian rua ida ne’e: sira koalia lian diferente, sira iha maneira atu tuku ita nia fuan. Sira koalia lian diferente. Nu’udar ita hatene distinge lian ida ho lian seluk, nune’e mos ita bele distingi lian Maromak nian no lian buat aat nian. Maromak nia lian nunka obriga: Maromak propoen, la impoen. Oinseluk, lian buat aat nian ne’ebé tenta, ataka, obriga: hodi kria iluzaun ne’ebé nabilan, emosaun ne’ebé atria, maibé liu lalais. Foufoun hamaus ita, halo ita fiar katak ita kbiit nain, maibé depois nia husik ita mamuk iha laran hafoin akuza ita : “ ó la vale liu”.
Maromak nia lian fali mak koriji ita, ho pasiensia boot, maibé nafatin fó korajen. Konsola ita: haboot ita nia esperansa. Maromak nia lian, lian ida ne’ebé iha ninia orizonte. Oinseluk lian buat aat nian ne’ebé lori ó ba muru ida, lori ó ba sikun.
Iha diferensia seluk tan. Lian inimigu nega/ lahateke ba tempu prezente, hakarak ita konsentra hodi tauk ba future no triste sira pasadu nian- inimigu lakohi tempu prezente:hamosu fali esperiénsia aat sira nu’udar injustisa ne’ebé halo ita terus…hanoin esperiénsia aat barak.
Maromak nia lian fali koalia ba tempu prezente: “ agora ó bele halo buat diak, agora ó bele prátika kreatividade domin nian. agora ó bele renúnsia arependimentu sira no arependimentu sira ne’ebé halo ó nia fuan dadur”. Anima ita, lori ita ba oin, maibé koalia iha tempu prezente: agora.
Dala ida tan: lian rua ne’e husu mai ita pergunta lahanesan. Ida ne’ebé mai husi Maromak mak : “ saida mak diak mai haú?”. Diabu fali insiti ita iha pergunta seluk : “ saida mak hau hakarak halo?” saida mak hau hakarak. Lian buat aat nian nafatin haleu hau/ ego, iha hau nia impulsu sira, iha hau nia presiza , buat hotu no kedas. Hanesan hahalok labarik sira nian: buat hotu no kedas. Maromak nia lian fali la promote ksolok ho folin baratu: Nia konvida ita atu hakat liu ita nia an atu hetan buat diak loos nian. dame. Hanoin ba: buat aat nunka fó dame, nia halo ita ezalta no tuir mai husik buat ne’ebé moruk. Ne’e mak istilu aat nian.
Ikus nian. Maromak nia lian no tentadór nian koalia ba ambiente ne’ebé la hanesan: inimigu prefere liu nakukun, falsidade, fofocas ( gossip, hoax) ; Maromak hadomi naroman loron nian, lialoos, transparensia, sinsera. Inimigu, sei dehan mai ita: “ taka ibun, laiha ema ida komprende ó no rona ó, keta fiar sira. Buat diak fali kontrariu, konvida ‘o atu loke an, sai transparensia no laran metin ba Maromak no ema seluk.
Maun no Bin alin doben sira, iha tempu ida ne’e, ne’ebé hanoin no preukupasaun barak, lori ita atu tama fali ita-nia an rasik. Ita tau atensaun ba lian ne’ebé mai to’o iha ita nia fuan. Mai ita husu, sira mai husi ne’ebé?. Ita husu grasa atu rekonese no tuir lian Bibi Atan Diak nian, ne’ebé hasai ita husi lidun egoism nian no lori ita ba duut matak liberdade loos nian. Ita Nai Feto Konsellu diak nian, orienta no akompana ita nia dixernimentu.
Hotu tiha Regina Coeli
Maun no Biin-alin doben sira,
Ohin ita selebra loron mundial orasaun nian ba vokasaun sira. Ezistensia Kristaun hotu nian mak hatan nafatin ba Maromak nia bolun, iha estadu moris naran deit. Loron ida ne’e fó hanoin mai ita buat ne’ebé loron ida Jezús dehan: ne’e mak to’os Maromak nian ne’ebé presiza ema barak atu serbisu, no presiza reza atu haruka serbisu nain ba Nia to’os ( Mat 9, 37-38). Saserdosiu no moris Konsagrada sira ezije korajen no perseveransa; no la ho orasaun ema la ba oin tuir dalan ne’e. Ha’u konvida imi hotu atu husu ba Maromak atu haraik serbisu nain ne’ebé diak ba Nai nia reinu, ho fuan no liman ne’ebé disponivel ba ninia domin.
Dala ida tan ha’u hakarak esprime hau nia proximidade ba moras covid 19, ba sira ne’ebé dedika an atu taumatan ba sira no ba ema hotu ne’ebé ho modo saida deit sofre ba pandemia. Iha tempu hanesan hau hakarak fo apoiu ba kolaborasaun internasional ne’ebé ativu ho inisiativa oin-oin, atu responde ho modo adekuadu no éfikaz ba krize grave ne’ebé ita moris daudaun. Buat ne’ebé importante mak tau hamutuk kapasidade ho modo transparensia atu hetan vasina no tratamentu sira ne’ebe garante asesu universal liu husi teknolojia esensial, ne’ebé permiti ba ema idak-idak iha mundu tomak ne’ebe kontajia atu hetan sanitaria ne’ebé nesesariu.
Hau fo pensamentu espesial ba asosiasaun “ Meter”promotora loron nasional labarik nian, ne’ebé sai vitima ba violensia, esplorasaun no indeferensia. Hau enkoraje responsavel no operador sira atu kontinua tuir sira nia asaun prevensaun no sensibilizaun ba konxiénsia hamutuk ho ajensia edukativa oin-oin. Agradese ba labarik sira husi asosiasaun ne’ebe haruka “collage” ho kór atus ida margarida nian. ba sira . obrigado.
Ita foin hahu fulan Maiu, fulan Marianu ne’ebe espesial, iha ne’ebé fiar nain sira ba vizita santuariu ne’ebé dedika ba Nai Feto. Tinan ida ne’e tanba situasaun sanitaria nian, it aba fatin sira fiar nian ho espiritualmente, hodi hasae iha Maria Virjen nia fuan ita nia preukupasaun, espetativa no projetu ba future.
Tanba orasaun nuudar valor universal, hau simu proposta husi komite aas nian ba fraternidade umana tan ne’e iha 14 Maiu fiar nain sira hotu husi relijiaun oinoin hamutuk espiritualmente ba loron orasaun Jejun no karidade, atu husu Nai nia tulun ba umanidade supera pandemia coronavirus. Imi hanoin ba: 14 Maiu, fiar nain sira hotu hamutuk ho fiar nain sira husi tradisaun oinoin atu harohan, halo jejun no halo serbisu karidade.
Boas festa ba imi hotu Domingu kmanek.
Keta haluha reza mai ha’u.
(Tradusaun – grupu estudante italianu)
