Papa Francisco nia lia-menon ba Domingu Batizmu nian molok Angelus (10 Janeiru 2021)
Maun no biin-alin sira, bondia!
Ohin ita festeja Batizmu Na’i nian. Ita foin husik, loron ruma liubá, Jezús ne’ebé Ema Matenek sira ba vizita, ohin ita hetan nian adultu ona iha Jordaun nia ninin. Liturjia lori ita halo haksoit ida besik tinan tolunulu, tinan tolunulu ne’ebé ita la hatene buat ida: ne’e mak tinan sira moris haksumik nian, ne’ebé Jezús haloa’o iha família – balun, primeiru iha Ejitu, nu’udar imigrante atu halai husi Erodes nia persegisaun, seluk iha Nazaré, hodi aprende José nia ofísiu – iha família hodi obedese nia aman-inan sira, estuda no serbisu. Impresionante katak Na’i nia tempu barak liu iha Rau nia pas anune’e, moris vida loroloron nian, hodi la hatudu an. Ita hanoin katak, tuir Evanjellu sira, tinan tolu mak tinan sira pregasaun nian, milagre no buat barak seluk. Tolu. No sira seluk, tinan sira seluk, vida haksumik an nian iha família. Ne’e mensajen furak ida mai ita: revela mai ita moris loroloron nia grandeza, ninia hestu no momentu ida-idak nia importánsia iha Maromak nia matan, ida simples liu mós, ida haksumik an mós.
Depoizde tinan tolunulu moris haksumik an nian hahú Jezús nia vida públika. No hahú duni ho batizmu iha mota Jordaun. Maibé Jezú sMaromak, tanba sá mak Jezús ba simu batizmu? João nia batizmu konsiste iha ritu penitensiál ida, sinál vontade atu konverte an, sai di’ak liután, hodi husu perdaun ba salan rasik. Jezús konserteza la presiza. Defaktu, João Batista buka atu kontra, maibé Jezús insiste. Tanba sá? Tanba Nia hakarak horik ho ema maksalak sira: tanba ne’e mak nia halo fila ho sira no hala’o sira nia jestu. Nia halo ho atitude povu nian, ho sira-nia atitude [ema nian] ne’ebé, hanesan knananuk litúrjiku ida dehan, nia hakbesik :klamar molik no ain molik”. Klamar molik, katak la taka buat ida, nune’e, sala-na’in. Ne’e mak jestu ne’ebé Jezús halo, no nia tun iha mota atu luku iha ita-nia kondisaun rasik. Batizmu, defaktu, signifika “imersaun”. Nune’e, iha loron dahuluk ninia ministériu nian, Jezús oferese mai ita ninia “manifestu programátiku”. Nia dehan mai ita katak Nia la salva husi leten, ho desizaun ukun nian eh hahalok forsa nian, dekretu ida, lae: Nia salva ita hodi mai hasoru ita no hodi foti ba nia an ita-nia salan sira. Nune’e mak Maromak manán aat mundu nian: hodi haraik an, hodi foti ba nia an rasik. Ne’e mós mak modu atu ita hakmaan ema seluk: la’ós hodi julga, la sujere sá mak tenke halo, maibé hodi hakbesik an, hodi terus ho ita, hodi fahe Maromak nia domin. Prosimidade mak Maromak nia estilu hasoru ita; Nia rasik dehan ba Moisés: “Imi hanoin bá: povu ida-ne’ebé mak ninia maromak sira besik liu ba sira hanesan imi iha ha’u”. Prosimidade mak Maromak nia estilu hasoru ita.
Despoizde Jezús nia jestu kompaixaun nian, akontese buat ruma estraordináriu: lalehan sira nakloke no finalmente Trindade revela an. Espíritu Santu tuun ho manu-falur nian (kf Mc 1,10) no Aman dehan ba Jezús: «Ó mak ha’u Oan, ida-ne’ebé ha’u hadomi» (v. 11). Maromak manifesta an bainhira mosu mizerikórdia. Keta haluha ida-ne’e: Maromak manifesta an bainhira mosu mizerikórdia, tanba ne’e mak nia oin. Jezús sai ema sala-na’in sira nia atn no Maromak proklama nu’udar Oan, nia haraik an to’o ita no Espíritu tuun ba Nia. Domin bolu domin. Ida-ne’e val mós mai ita: iha jeztu ida-idak servisu nian, iha obra ida-idak mizerikórdia nian ne’ebé ita halo Maromak manifesta an, Maromak tau nia hateken ba mundu, Ida-ne’e vale mai ita
Maibé, molok ita halo buat runa,ita-nia moris marka ho mizerikórdia ne’ebé fihir ita, Ita hetan salvasaun gratuitamente. Salvasaun ne’e grátis. Ne’e mak Maromak nia jestu mizerikórdia nian mai ita. Sakramentalmente ne’e akontese iha loron ita-nia Batizmu nian; maibé ema ne’ebé la simu batizmu mós simu Maromak nia mizerkórdia, nafatin, tanba Maromak iha ne’ebá, hein ita, hein, hein atu loke fuan nia odamatan sira. Nia halbesik, ha’u barani dehan, nia hamaus ita ho ninia mizerikórdia.
Na’i-Feto, ne’ebé oras ne’e ita harohan bá, tulun ita atu rai didi’ak ita nia identidade, katak identidade ema simu mizerikórdia nian, ne’ebé sai baze fiar no moris nian.
