Dili – Iha loron 29 -12-2019, iha komunidade Saun Jose-Novisiadu Komoro, irmán sira iha komunidade rua Novisiadu no Divina Providensia, halibur hamutuk ho sira nia familia atu selebra Festa Sagrada Familia hamutuk. Tamba Irmán sira husi komunidade rua husu Nailulik hanesan, tan ne’e konferensia no Misa selebra hamutuk maibe han meio-dia no divertimentu ida-idak ba nia komunidade ho sira nia familia.
Iha momentu konferensia nian Pe. Agustinho dehan: “Diak liu iha han hamutuk ne’e ita bo’ot sira mos bele rona buat ruma ne’ebe tulun ita bo’ot sira nia moris. Iha ne’e ita sei hare element importante kona relasaun entre fen ho laen no aman-inan ho oan sira. Dezafiu barak mosu iha ita nia rai depois de 99 mai leten, iha familia relasaun fen-laen no oan sira la rona inan-aman. Element sentral ba moris mak “domin”. Ita nia fiar dehan Maromak mak domin, tanne’e Ita hotu presiza fo domin no simu domin. Nu’udar familia element ida ne’e importante teb-tebes. Domin konkretu ita hare iha Amo Papa nia documentu “Amoris Laeticia” ka ksolok iha familia laran katak buka atu hasoru malu nafatin. Servisu importante maibe domin entre fen-laen importante liu fali. Kontaktu nafatin liu husi media ka direitamente, tamba relasaun entre familia atu hasoru malu importante liu fali. Tamba problema barak ne’ebe akontese iha moris ne’e hahu husi ladun iha komunikasaun. Nune’e komunikasaun ne’e element ne’ebe nesesariu liu. Wainhira hasoru malu presiza rona malu, rona malu ne’e mak servisu ida ne’ebe todan tebes. Amo Papa husu aprende rona ema seluk, rona signifika husik ema hasai buat ne’ebe iha nia laran. Agora ema sibuk liu ho hand phone, nune’e hamenus komunikasaun entre familia. Krizi ohin loron mak solidaun. Husik 
hand phone atu bele rona malu. Problema fundamental laos seksual maibe domin; pasiensia ba malu, rona malu, simu malu. Tuir mai ita hare ba edukasaun oan sira nian. Edukasaun valor nian. Edukasaun ne’e hahu kedas husi ki’ik. Akompanhamentu inan-aman nian hahu husi tinan rua ka tolu ba leten. Edukasaun hahu husi uma laran, fo servisu tuir sira nia idade. Hahu kiik tamba bo’ot ona susar atu halo tuir. Eduka katak laos halo tuir buat ne’ebe nia hakarak. Papa Francisco dehan labele fo sasan elektroniku ba oan sira, tamba sei estraga sira nia futuru, fo buat ne’ebe esensial ba labarik sira. Edukasaun diak mak hanorin oan sira atu aprende moris ho sakrifisiu. Ida tan mak ambiente, kria konfiansa entre inan-aman no oan sira. Komprende mos sira, liu-liu sira ne’ebe bo’ot ona. Akompanha oan sira, fo tempu ba oan sira atu fo sai sira nia hanoin. Komprimenta ema, hahu husi dader, hatene komprimenta maluk sira. Amo Papa dehan iha nia dokumentu mak: “lisensa, deskulpa no obrigada”. Liafuan sira ne’e importante sira relasaun familia no sosiedade. Ohin loron susar tebes atu uza liafuan sira ne’e iha moris loro-loron. Buat ne’ebe importante liu ba ita mak domin liu husi relasaun iha familia no edukasaun ba oan sira”. Hotu tiha kontinua ho Misa no han hamutuk. Obrigada barak ba familia sira hotu ne’ebe mai ona fahe tempu, ksolok, domin no diak hotu ho ami iha loron ida ne’e. Imi nia prezensa suporta tebes ami atu sai aten brani liu tan lao ba oin iha dalan ida ne’e. Sagrada Familia Nazare sei haraik bensaun no tulun wain ba imi hotu iha moris ne’e.
Ir. Noemia de Deus
