“Dame hela ho imi!”
Ida ne’e Kumprimentu antigu liu, ne’ebé akontese nafatin too ohin loron iha kultura oioin, ne’ebe iha kalan Páskua nia hakonu ho kbiit foun Jezús moris-hi’as nian,ne’ebe iha Nia ibun hato’o. «Dame ba imi» (Jo 20, 19, 21) ida ne’e mak Ninia Liafuan ne’ebé la’ós de’it votus parabens nian, maibé lori mudansa definitiva iha sira ne’ebé simu Nia nune’e mos iha realidade tomak. Tanba ne’e mak Apóstolu sira-nia susesór loron-loron fó sira nia lian, iha mundu tomak, ba revolusaun silensioza: «Dame hela ho imi!» Desde kalan ne’ebé ha’u hetan eleisaun nu’udar Bispu Roma nian, ha’u hakarak hato’o ha’u-nia saudasaun iha proklamasaun koral ida-ne’e. No ha’u hakarak repete fali: ida-ne’e mak Kristu moris-hi’as nia dame, dame ida ne’ebé dezarmadu, dame ida ne’ebé dezarmante, haraik-an no perseverante. Ne’ebe mai hosi Maromak, Maromak ne’ebé hadomi ita hotu inkondisionalmente.
Dame Kristu Moris-Hi’as nian
Bibi-Atan Di’ak mak manán mate no harahun moru separasaun nian entre ema sira (kf. Ef 2,14), ne’ebé saran nia moris ba nia bibi sira no iha bibi lubun seluk ne’ebe hale’u hela nia luhan (kf. Jo 10,11, 16): Kristu, ita-nia dame. Ninia prezensa, ninia don, ninia vitória halian iha sasin barak nia perseveránsia, liuhusi Maromak nia obra sira ne’ebe kontinua iha mundu, sai vizivel liután no nabilan iha nakukun tempu nian.
Dame ida ne’ebé la ho arma (Dezarmadu)
Molok hetan kapturasaun, iha momentu ida konfiansa maka’as, Jezús hateten ba sira ne’ebé hamutuk ho Nia: “Ha’u husik hela dame ba imi; ha’u fó ba imi ha’u nia dame. La’ós hanesan mundu fó.” No Nia hatutan kedas: «Imi keta laran taridu, keta ta’uk» (Jo 14,27). Perturbasaun no tauk ne’e bele iha relasaun ho violénsia ne’ebé sei akontese ba Nia. Ho klean liután, Evanjellu sira la subar katak buat ne’ebé halo dixípulu sira laran-taridu maka Ninia resposta lahó violénsia: dalan ida ne’ebé ema hotu, uluknanain mak Pedro, kontesta, maibé Mestre husu sira atu tuir to’o rohan. Jezús nia dalan kontinua sai fonte ba perturbasaun no tauk. No Nia repete ho firmeza ba sira ne’ebé atu defende Nia: «Tau fali imi-nia surik iha nia fatin» (Jo 18,11; kf. Mt 26,52). Jezús moris-hi’as nia dame la iha arma, tanba nia luta laho arma, iha sirkunstánsia istórika, polítika no sosiál sira ne’ebé loos. Sarani sira tenke sai sasin profétiku ba buat foun ida-ne’e hamutuk, hodi hanoin kona-ba trajédia sira ne’ebé sai kompleso beibeik. Ai-knanoik boot Tesi-Lia Ikus nian konvida sarani hotu atu hala’o ho mizerikórdia, konxiente kona-ba ida-ne’e (kf. Mt 25,31-46). No hodi halo nune’e, sira sei hetan iha sira-nia sorin-sorin maun-alin sira ne’ebé, ho maneira oioin, hatene rona ema seluk nia moras no liberta an internalmente hosi bosok violénsia nian.
Dame ida ne’ebé dezarmante (dame ida ne’ebé, Sereno no trankuilidade)
Di’ak maka dezarmamentu. Karik ida-ne’e maka Maromak halo an sai kiik. Mistériu Enkarnasaun nian, ne’ebé iha ninia pontu estremu mak hodi hatun iha infernu, hahú iha inan foin-sa’e ida nia knotak no revela iha balada- han fatin Belém nian. «Dame iha rai», anju sira hananu, hodi fó sai prezensa Maromak laiha defeza, ne’ebé umanidade bele deskobre ninia domin tau matan nian. (kf. Lucas 2,13-14). Laiha buat ida mak iha kbiit atu muda ita hanesan labarik ida. No karik presizamente hanoin kona-ba ita-nia oan sira, kona-ba labarik sira no mós kona-ba sira ne ebé frajil hanesan sira, mak sona borus fuan (kf. Apóstolu sira-nia hahalok 2,37). Kona-ba ida-ne’e, ha’u nia Predesesór ne’ebé veneradu hakerek katak “frajilidade umana iha kbiit atu halo ita matan-moris liután kona-ba saida maka duro no saida maka pasa liu ona, saida maka fó moris no saida maka oho. Karik ida-ne’e maka dala barak ita iha tendénsia atu nega ita-nia limite sira no evita sira ne’ebé frajil no kanek: sira iha kbiit atu tau iha kestaun diresaun ne’ebé ita hili ona, nu’udar ema ida-idak no nu’udar komunidade.
Karik ida-ne’e sai hanesan fruto ida husi Jubileu Esperansa nian, ne’ebé inspira ona ema millaun resin atu deskobre fila fali sira-nia an nu’udar peregrinu no atu hahú iha sira-nia laran dezarmamentu fuan nian, neon no moris nian ne’ebé Maromak sei la tarde atu hatán hodi kumpre ninia promesa sira: “Nia sei tesi-lia entre nasaun sura sai juiz ba ba povu barak, Sira sei tuku sira-nia surik sai ai-riin no sira-nia diman sai ai-kabelak.
Nação ida sei la foti tan surik hasoru nação seluk, no sira sei la aprende tan funu.“Uma Jacob nian, mai, mai ita la’o iha Na’i nia naroman” (Isaías 2:4-5).
Husi Vatikanu, 8 Dezembru 2025
Fonte: Vatican.Va
Testu Kompletu iha link ne’e
https://www.fmatin.org/wpn/download-category/dokumentu-amu-papa/
