Depois de selebrasaun Eukaristia iha solenidade asensaun Na’i nian, Papa Leao XIV hato’o saudasaun ba partisipante sira iha Jubileu Família sira-nian, Labarik sira-nian, Katuas-ferik sira-nian! hodi dehan katak:
“Ha’u kontente atu simu labarik barak, ne’ebé hamoris ita-nia esperansa! Ha’u kumprimenta família sira hotu, kreda doméstika ki’ik sira, iha-ne’ebé simu no transmite Evanjellu. Família – dehan Saun João Paulo II – iha nia orijen iha domin ne’ebé Kriadór hakuak mundu kriadu (Letter Gratissimam sane, 2). Atu fiar, esperansa no karidade buras nafatin iha ita-nia família sira. Saudasaun espesiál ba avó sira no ferik-katuas sira. Ita-boot sira maka modelu fiar no inspirasaun jenuínu ba jerasaun foun sira. Obrigado ba ita-boot sira nia prezensa!
Ha’u hato’o ha’u-nia saudasaun ba peregrinu sira hotu ne’ebé prezente, liuliu ba sira ne’ebé mai husi Dioseze Mondovì, iha Piemonte.
Ohin iha Itália no iha rai oioin selebra solenidade Ascensaun Senhor nian. Ne’e selebrasaun furak tebes, ne’ebé halo ita hateke ba objetivu ita-nia viajen rai nian. Iha orizonte ida-ne’e ha’u hanoin katak horisehik iha Braniewo, Polónia, Cristofora Klomfass no irmán sanulu-resin-haat seluk hosi Kongregasaun Santa Catarina Virjen no Mártir hetan beatifikasaun, oho iha tinan 1945 hosi soldadu sira Ezérsitu Vermellu nian iha territóriu sira Polónia ohin nian. Maski ho klima ódiu no terror hasoru fiar Katólika, sira kontinua serbí ema moras no oan-kiak sira. Ami konfia ba intersesaun mártir foun sira beata nian feto relijioza sira hotu iha mundu ne’ebé ho laran-luak gasta sira-nia an ba Maromak nia Reinu.
Ha’u mós hanoin hikas Loron Mundiál Komunikasaun ohin nian no ha’u agradese traballadór sira mídia nian ne’ebé, hodi asegura kualidade étika husi mensajen sira, tulun família sira iha sira-nia knaar edukasionál.
Atu Virjen Maria haraik bensaun ba família sira no apoia sira iha sira-nia difikuldade: ha’u hanoin liuliu ba sira ne’ebé terus tanba funu iha Médiu Oriente, iha Ukránia no iha parte seluk mundu nian. Maromak nia Inan tulun ita atu lao hamutuk iha dalan dame nian.
