Irmán sira iha Cailaco nia misaun, mak misaun ne’ebé loos duni, ba kiak sira no iha periferia. Sira haruka notísia ruma mai ita.
Promosaun feto
Señora sira ne’ebé mai aprende cortes e costura iha Cailaco, hahú loke ona alfaiate kiik 2 iha sira Nia bairru. No sira kontinua husu madre sira atu akompaña. Nunee madre Teresa kontinua ba sira nia fatin atu tulun no suporta sira. Sira agradese tebes tanba Ho buat ne’ebé sira aprende bele aplika no bele sustenta familia nia moris.
Señora sira ne’e husi parókia Atabae. Ho sakrífisiu boot sira hakur mota mai aprende maibé rezultadu ne’ebé sira hetan halo sira kontente.
Asaun karidade iha periferia
Iha 15 Jullu2020 komunidade ba vizita Sarani sira iha Goulolo (periferia Ida iha Cailaco) maski viajen difisil tan dalan ba fatin refere aat liu maibé lahamate dezeju apostoladu iha periferia.
Ita nia prezensa iha sira leet mak ksolok boot ba sira no halo sira sente katak ita iha interese ba sira hodi hakat ba sira nia fatin. Ami hela loron ida ho sira no loron tuir mai mak ami fila.
(FMA CAILACO)
