Missa agradesementu ba don Santidade nian ne’ebe Aman Maromak haraik ba Instituto Filhas de Maria Auxiliadora liuhusi Santa Maria Troncatti, hetan paritisipasaun barak husi Familia Salesiana sira, hirak ne’ebe marka prezensa husi SDB, FMA no familia Salesiana tomak ne’ebe pertense ba Paroquia Maria Auxiliadora Comoro Dili. Familia Salesiana tomak hamutuk ho Institutu Filhas de Maria Auxiliadora hasa’e hahi no agradese ba Maromak ba grasa Santidade nia ne’ebe haraik ba Madre Maria Troncatti.Selebrasaun Eukaristika hahu iha oras tuku 06.00 lorokraik otl, molok selebrasaun, irman Ermelinda Gomes, FMA apresenta istoria kona ba Madre Troncatti liu husi Video, hafoin mos apresenta sasin Senhor Juwa Bosco ne’ebe hetan milagre husi intersesaun Madre Maria Troncatti.
Iha omilia Padre hateten, Madre Maria Troncatti ho nia simplisidade tomak hodi hatan sim mak halo nia sai Santa, iha titulo tolu mak Instituto oferese ba Madre Maria Troncatti, Inan, Missionaria, artezana paz no rekosiliasaun nian, ha’u fali sita buat lima kona ba Madre Taroncatti;
- Inan di’ak, nia Inan di’ak tanba nia iha fuan inan nian hodi tau matan ba labarik sira iha amazonia, nia simu sira ho domin no la hare ba sira nia kor.
- Katekista, nia haklaken Cristo ba ema sira iha rai ne’eba, nia sa’e kuda hakur mota hodi lori liafuan di’ak ba sira fo koinese Jesus ba sira.
- Edukadora, tanba nia fo edukasaun, oferese ba sira dignidade lolos ema nia, loke eskola ba sira simu sira eduka sira ho domin.
- Infermeira, nia la’os de’it infermeira ba isin nian maibe infermeira mos iha parte spiritual nian, nia kura ema nia kanek sira iha parte isin nia no tempu hanesa nia kura kanek sira spiritual nian.
- Missionaria extra-ordinaria, nia missionaria ida ne’ebe oferese nia an totalmente ba povu Ekuador nia di’ak, tanba ne’e mak nia dehan, (ha’u haksolok tebes iha ne’e no haksolok tebes mate mos iha ne’e).
Irman Maria sai duni modelu Santidade nia ba ita, nia tau nia fiar tomak iha Maromak no Maria Auxiliadora nia hatene rona lian sira ne’ebe bisu-bisu ba nia tilun, hanesan iha tinan 1915 bainhira inundasaun bo’ot kauza ema barak nia vida, iha momentu ne’eba mak nia rona bisu-bisu ida dehan “o tenke sai missionaria” no nia hatan “se ita salva ha’u husi inundasaun ne’e, ha’u promote sei sai missionaria ida” Santa Maria Troncatti moris tuir duni Don Bosco no Madre Mazzarelo nia exemplu ne’ebe nakonu ho espiritu missionaria nia, Don Bosco no Madre Mazzarello hakarak tebes atu soi foinsa’e sira nia klamar, Santa Maria Troncatti soi duni povo Ekuador sira nia klamar.
Hanesan iha evanjelho dehan; “ksolok ba sira ne’ebe bainhira ha’u hamlaha sira fo han ha’u, ha’u hamrok sira fo hemu ha’u, ha’u la’o rai sira fo uma ha’u, ha’u moras he kadeia sira vizita ha’u” ksolok tebes duni ba Santa Maria Troncatti basa nia fo han, fo hemu, oferese uma, visita sira ne’ebe moras no kadeia iha rai Ekuador povu Kolonia no Shuar nia leet. Mai ita Familia bo’ot Salesiana mos banati tuir Santa Maria Troncatti nia vertude sira hodi sai fonte dame nia ba ita nia maun alin sira, familia sosiedade no nasaun. Obrigado barak ba ema hotu ne’ebe marka ona prezensa iha selebrasaun ida ne’e.
Postulante. Joana Soares
