RV/Redasaun – Rekoñese an rasik nu’udar ema maksalak atu bele moris-hi’as ho Na’i ba moris foun. Iha katekeze audiénsia jerál iha Aula Paolo VI, 22 Dezembru nian, Papa Francisco Amu-Papa ko’alia kona-ba ritu introdusaun Missa nian, hod kontinua reflesaun kona-ba Selebrasaun eukarístika ne’ebé nia hahú iha 11 Novembru liubá.
Keta to’o tarde ba Missa
Iha missa iha parte fundamentál rua: Liturjia Liafuan nian no Liturjia eukarístika, isin ida-de’it ne’ebé labele haketak malu. Importante koñese sinál sira, momentu oioin, subliña Papa Francisco, atu moris “Missa ho nakonu” no saboreia beleza. Pontu dahuluk mak ritu introdusaun nian, ne’ebé nia finalidade mak forma komunidade ida: “atu penitensiál, orasaun kolekta, kolekta intensaun sira povu nian ne’ebé sae ba Lalehan nu’udar orasaun. Hafoin importante atu keta to’o tarde, Papa Francisco subliña:
Missa hahú ho sinál Krús nian, ho ritu introdusaun sira-nian, tanba iha-ne’ebá hahú atu adora Maromak nu’udar komunidade. No tanba ne’e importante prevé atu la to’o tarde, maibé to’o antes, atu prepara fuan ba ritu ida-ne’e, ba selebrasaun komunidade nian.
Hanorin labarik sira atu halo didi’ak sinál Krús nian
Missa mak “enkontru ho Kristu” no amululik fó sasin ba ida-ne’e bainhira nia tama, re’in no insensa altár, ne’ebé figura Kristu nian. Nune’e, konvite mak la’ós hateke ba oin, maibé :hateke ba Kristu”, ne’ebé la dook husi komunidade. Aleinde ne’e, sinál krús nian fó hanoin kona-ba Santíssima Trindade, no afirma katak orasaun litúrjika mak “enkontru ho Maromak iha Jezús Kristu, ne’ebé mai ita enkarna an, mate iha krús no moris hi’as ho glória”.
