Com – Ohin loron 1 Janeiru tinan foun ba 2022 no solenidade Maria Maromak nia Inan nian, Irmán sira iha komunidade Maria Auxiliadora no komunidade Madre Mazzarello halo paseiu hamutuk iha Com-Lospalos. Molok bá paseiu, Irmán sira husi komunidade rua ne’e misa hamutuk iha kapela komunidade Mazzarello ne’ebé prezide husi Pe. Abrão Pinto Soares SDB. Iha omilia amu selebrante fó lia-menon katak, iha tinan foun ida ne’e ita aprende husi Maria ninia atitude Rona no Disponibilidade nian. Nune’e ita bele aplika iha ita-nia misaun atitude Rona no Disponibilidade nian ba foin-sa’e sira, labarik sira no ema hotu ne’ebé ita sei hasoru iha tinan foun ida ne’e.
Objetivu husi paseiu ne’e mak momentu ida atu hametin liután ami-nia komuñaun no fraternidade entre ami. Sai mós momentu rekreiu nian hodi troka ambiente no hola anin-foun nune’e ho hanoin ne’ebé fresku ami prepara an atu hasoru misaun iha tinan foun ida ne’e.
Ami hotu haksolok ho Maromak nia maravilla liu husi ema sira ne’ebé ami hasoru iha tasi ibun, ne’ebé ho ksolok selebra tinan foun ida ne’e ho sira-nia família no belun sira. Liu husi mós natureza sira ne’ebé ami haree bainhira viajen husi Venilale – Com- Fuiloro- Lospalos – Venilale.
(Alice Filipe FMA)
