Dili – Irmán sira husi komunidade tolu iha Comoro (Dili) selebra hamutuk Eukaristia ho Mons. Marco Sprizzi, Reprezentante Papa Francisco nian iha Timor-Leste, loron 30 Dezembru 2020. Missa iha Oitava Natál nia laran mak Missa Natál nian ne’ebé hanaruk iha loron ualu nia laran.
Iha omilia, Mons Marco hateten katak oras-ne’e ita sei moris espiritualidade Natál nian”. Nia konvida atu ita moris espiritulidade Natál, “iha moris loroloron no moris iha roman Natál nian”.
Hafoin nia hatutan tan katak, bainhira nia harohan rozáriu iha mistériu ksolok nian, iha mistéru datoluk ko’alia kona-ba Jezús nia moris. Iha momentu ne’e nia halo halo orasaun ki’ik-oan ida hanesan tuirmai ne’e:
«Jezús moris iha ha’u-nia fuan
Moris iha ha’u-nia neon
Moris iha ha’u-nia hanoin
Moris iha ha’u-nia liafuan
Moris iha ha’u-nia desizaun
Moris iha ha’u-nia ta’uk
Moris iha ha’u-nia difikuldade
Moris iha ha’u-nia relasaun umana sira».
“Ida-ne’e mak modu atu moris iha Natál,wainhira Nia moris no sai boot iha ita-nia laran, iha buat hotu ne’ebé ita halo loroloron; iha Orasaun, Misa, bainhira matabixu, entre Irmán sira, ema ne’ebé ita hasoru no iha buat hotu ne’ebé ita halo iha servisu, halo Jezús moris iha ne’ebá. Jezús rona ita nia orasaun se ita harohan ho sinseridade. Furak liu se ita halo Nia sai ha’u, iha ha’u nia hanoin, ha’u nia ko’alia, iha buat hotu ne’ebé ha’u halo, sei fó fuan ba moris rohan laek, fó fuan iha Apostoladu no sasin sira”, Mons Marco remata.
(Onesiana, FMA-Ana Ivonia, FMA)
