Santu Eusébio, bispu Vercelli nian, hala’o nia moris ezíliu nian iha Rai Oriente no Palestina nian. Bainhira iha Palestina, nia hetan kuadru furak ida Na’i-Feto ‘Consolata’ nian (Consoladora dos aflitos). Fila husi ezíliu, nia lori kuadru ne’e ho nia no fó nu’udar prezente ba Bispu Torino nian, iha Itália. Bispu ne’e mak santu ida Saun Massimo.
Bispu ne’e rekoñese kuadru ne’e nia fafurak no importánsia devosaun nian ba Na’i-Feto ‘Consolata’ nian, nia halo altár ida dedika ba nia iha de Santu André nian no bolu povu atu venera Na’i-Feto ho títulu foun ida-ne’e. Milagre barak hahú akontese liuhusi intersesaun Na’i-Feto invoka ho naran ‘Consolata’.
Liu tinan 400 mak kuadru ne’e tau ba sarani sira nia venerasaun no orasaun. Na’i-Feto ‘Consolata’, iha santu sira-nia vizaun, lori ema hotu ba konsolasaun loos no ida mesak ema nia fuan nian: Jezús Kristu.
Erezia kontra igreja
Iha tinan 820 ereje ikonklasta sira, katak sira ne’ebé harahun imajen sira/íkone sira, invade Torino no harahun buat hotu ne’ebé refere ba fiar kristán. Relijiozu sira subar buat hotu sira bele subar, inkluzive kuadru Na’i-Feto ‘Consolata’ nian. Tanba ne’e, kuadru ne’e ema haluha tiha iha katakumba sira igreja Torino nian. Kuadru ne’e hela iha-ne’ebá ba tinan 100 resin. Ema hanoin katak kuadru ne’e mós ikonoklasta sira harahun mós.
Redeskoberta kuadru Na’i-Feto ‘Consolata’ nian
Iha tinan 1014, Markés italianu ida naran Arduino, moras boot. Iha nia toba-faatin terus no orasaun nian, nia iha vizaun ida Na’i-Feto nian. Iha vizaun ne’e, Maria husu ba nia atu harii igreja ida iha ruína sira igreja tuan Torino nian. Depoizde vizaun ne’e, Arduino hetan isin di’ak.
Tanba ne’e, nu’udar forma agradesimentu nian, nia hahú konstrusaun igreja foun, hanesna Na’i-Feto husu. Iha eskavasaun sira igreja tuan nia ruína sira, sira ho modu milagroza hetan hikasfali kuadru Na’i-Feto ‘Consolata’ nian. Imajen hanesan ho Na’i-Feto ne’ebé mosu ba Arduino. Ne’e konsolasaun boot ba igreja lokál.
Funu ida tan iha Torino no milagre foun
Liutiha tinan 100 resin, funu foun harahun sidade Torino no igreja iha-ne’ebé iha imajen Na’i-Feto ‘Consolata’ nian. No, dala ida tan, kuadru ne’e subar iha ruína sira ba tinan barak, Dala ida tan, ema hanoin katak kuadru rahun ona no sai tristeza boot ba povu.
Milagre boot Na’i-Feto ‘Consolata’ nian
Maria Santíssima, iha forma Na’i-Feto ‘Consolata’ nian mosu ba ema matan delek ida ne’ebé moris dook husi Torino. Nia naran John Ravais no nia hela iha Fransa. Iha ,ehi, Na’i-Feto husu ba nia atu bá Torino ke’e ruína sira igrekja nian atu hetan imajen.
Maria mós husu ba nia atu harii hikasfali igreja no promete katak nia sei sai di’ak husi matna delek.. John Ravais obedese kedas. Bainhira nia to’o iha Torino, nia buka Bispu, no depoizde rona ninia istória, fó apoiu hotu atu buka imajen ‘Consolata’ nian. Sira halo kontratu ba pedreiru sira n o hahú eskavasaun sira.
No, hanesan John Ravais haree iha ninia mehi sira, sira hetan kuadru Na’i-Feto ’Consolata’ nian. Bainhira John Ravais besik ba kuadru, nia hetan kedas kura husi matan-delek.Ksolok boot ba sira hotu. Loron ne’e mak 20 Jullu 1104.
Devosaun ba Na’i-Feto ‘Consolata’ nian
Hahú husi milagre ida-ne’e populasaun Torino nian asume Na’i-Feto ‘Consolata’ nian nu’udar protetora no padroeira sidade nian. Devosaun habelar iha rejiaun, hafoin iha Itália tomak, no tuirmai iha Europa no mundu tomak. Iha Torino iha Santuáriu ida dedika ba ‘Consolata’. Peregrinasaun husi mundu tomak bá to’o iha-ne’ebá atu haree kuadru no harohan ba Na’i-Feto ‘Konsolasaun nian.
Santu sira husi Torino ne’ebé iha ligasaun boot ba Na’i-Feto ‘Consolata’ no ninia santuáriu mak Saun Giuseppe Cafasso, Saun Giovanni Bosco no San Leonardo Murialdo; aleinde ne’e iha Beatu Giuseppe Allamano, fundadór Institutu ‘Missioni Consolata’ nian no serbisu ho Don Bosco iha oratóriu.
Nia festa monu iha loron 20 Juñu, data ne’ebé John Ravais hetan milagre ne’ebé kura nia matan delek.
Orasaun ba Na’i-Feto ‘Consolata’
Óh Inan ‘Consolata’, iha lalehan ita mak Liurai-Feto Anju no Santu sira-nian, no iha rai ita mak Inan konsolasaun nian. Ita mak ‘Consolata’, no ha’u, ita-nia oan, husu ba ita konsolasaun no grasa (temi grasa ne’ebé husu…). Inan doben, ita hatene oinsá, ita hatene dalan atu rona ha’u, tanba ne’e ha’u konfia iha ita. Ita dehan liafuan ida ba Jezús ne’ebé ita lori iha ita liman ho domin no kariñu, no ne’e natón atu ha’u koko ksolok no konfortu. Hodi hetan konsolasaun husi ita no husi ita Oan, ha’u sei iha kbiit atu konsola ha’u-nia maun no biin-alin sira ne’ebé terus liután. Ha’u sei hatene enfrenta ho serenidade difikuldade sira, hodi hetan iha ita tulun no protesaun. Amén.
Na’i-Feto ‘Consolata’, harohan mai ami!
