Na’i-Feto Montserrat
Padroeira Cataluña nian (España)
Memória litúrjika 27 Abríl
Íkone mariana sira ho karakterístika morena (metan) bele hetan iha Europa no mós iha Amérika Súl no Filippinas. Hotu-hotu aprezenta karakterístika komún, tuir Jacques Huynen, espesialista Na’i-Feto morena sira-nian. Hotu-hotu nia orijen iha époka Medioevo; sira hotu Virjen Liurai-Feto, tur iha tronu ki’ik ida no, iha fatin sira ne’ebé iha estátua sira-ne’e sai sentru importante peregrinasaun nian. Entre sira-ne’e, inklui Virjen Montserrat nian, ne’ebé ninia abut maizumenus iha tinan 800 dK.
Na’i-Feto morena Montserrat nian no ninia istória
Virjen Montserrat nian (La Mare de Déu de Montserrat iha Cataluña), iha istória milenária. Tuir lenda, estátua ne’e bibi-atan foin-sa’e sira mak hetan iha tinan 880, ne’e duni iha Medioevo nia klaran. Iha loron ne’ebá, besik loron monu, bibi-atan sira haree naroman boot iha foho Montserrat nian (mont=foho; serrat=kroat; foho sira nia forma kroat; foho aas liu iha metru 1.236). Sira bá to’o fatin ne’e, deskobre gruta ki’ik ida ne’ebé ke’e iha foho, no nia laran sira hetan Na’i-Feto nia ilas.
Kultu
Bispu sidade besik Mausera nian, hatene tiha akontesimentu ne’e, organiza atu lori estátua ne’e (aas la liu 95 cm), maibé, la konsege foti. Nune’e, bispu interpreta ne’e nu’udar sinál Beata Virjen nia vontade atu hela iha fatin ne’ebá no bispu fó orden atu harii santuáriu. Husi momentu ne’e mak hahú kultu ba Virjen Montserrat nian no hahú mós mosteiru ida iha-ne’ebá.
Estátua “Moreneta” nian
Íkone mariana Montserrat nian, ne’ebé venera iha Santuáriu hatuur iha foho leten, reprezenta Beata Virjen, ho oin morena, kous nia Oan Kosok-Oan Jezús. Iha nia liman loos, Na’i-Feto kaer esfera ida simboliza universu. Jezús Kosok-Oan, ho liman loos halo jestu fó bensan nia. Ilas ne’e pinta ho osan-mean, maibé nia liman no oin sira reprezenta iha kór-kafé, morena. Komunidade ne’ebá bolu Na’i-Feto Monserrat nian ho naran populár “Moreneta”.
Iha 11 Setembru 1844, Papa Leão XIII deklara ofisialmente Virjen Montserrat nian nu’udar padroeira diseze Cataluña nian. Nia fó mo priviléjiu atu iha Missa no Ofísiu própriu.
Virjen Montserrat nian mak imajen mariana primeira España nian atu simu Koroasaun Kanónika iha 1881.
Orasaun ba Na’i-Feto Montserrat nian
Oh Inan Santa, fuan nakonu ho Domin, nakonu ho mizerikórdia, ne’ebé nafatin rona no konsola, simu ami-nia hamulak sira. Nu’udar ita oan sira, ami husu ita-nia intersesaun iha ita Oan Jezús nia futar oin. Ho komprensaun no kompaixaun simu pedidu sira ne’ebé ami aprezenta ba ita, espesialmente (dehan pedidu espesífiku). Konsolasaun boot tebes hatene katak ita-nia Fuan nafatin nakloke ba ema sira ne’ebé diriji ba ita! Ami entrega ba ita-nia kuidadu no ba ita-nia intersesaun ami-nia família sira no ema hotu ne’ebé moras, mesak no kanek. Tulun ami, Inan Santa, atu tahan naha-todan sira moris nian atu to’o hodi partisipa iha Glória rohan-laek no iha Maromak nia damen. Amén.
Na’i-Feto Montserrat nian, harohan mai ami.
