Cailaco – “Natal mak festa família nian” liafuan ne’e mak espresaun primeiru ne’ebe’ sai husi Amu-bispu Norberto nia ibun bainhira ami ba vizita nia iha nia rezidensia 0hin, 27 dadeer.
Komunidade hamutuk ho Oratorianu, OPIAM, Akólitu sira no reprezentante husi inan-aman balun ba kumprimenta Bispu Norberto hodi hatoo ksolok Natal nian iha nia rezidénsia. Amu-Bispu hateten katak nia haksolok tebes ho inisiativa ida-ne’e no nia husu atu kontinua halo atividade oi-oin atu envolve labarik sira tanba husi kiik kuda ona buat diak sei fo influensia ba sira nia moris iha futuru. Nia mos dehan katak Natal mak festa família nian nune’e nia kontente ami ba ho inan aman no labarik sira.
Hanesan Mu-bispu dehan katak Natal mak festa família nian, ami sente duni iha ami nia komunidade tanba molok ba kumprimenta Bispu iha Tersa 25/12 komunidade halo inisiativa 
atu Natal hamutuk ho sarani sira iha Cailaco. Labarik sira aprezenta drama Natal, kanta no dansa ba sarani sira. Ema hotu kontente hodi haree labarik sira nia aprezentasaun no sente duni katak Natal festa família nian duni hodi unifika ita nudar família boot Maromak nian.
Loron tuir mai 26/12 ami hamutuk ho labarik sira vizita ema moras sira, no hirak ne’ebe presiza tulun ami ba reza ho sira hafoin kanta hodi hatoo ami nia Boas festa Natal nian. Família hirak ne’e kontente laos tanba ami lori sasan maibe liu-liu tanba prezensa. Furak no signifikadu duni Natal nudar festa família nian no lori mai ita inspirasaun foun iha ita nia moris no apostoladu.
(Albina do Carmo)
