8 Setembru
FESTA NATIVIDADE MARIA NIAN
Evanjellu Mt 1,1-16.18-23
«Jezús Kristu nia bei-ala sira husi David to’o Abraun mak ne’e: Abraun mak Isaac nia aman; Isaac Jacob nia aman; Jacob mak Judá ho nia alin sira nia aman. Judá ho Tamar hahoris Fares no Zara, Fares mak Esraun nia aman; Esraun, Araun nia aman, Araun fali hahoris Aminadab; Aminadab Naassao nia aman; Naassao Salmaun nia aman. Salmaun ho Racab hahoris Booz; Booz ho Rute hahoris Obed; Obed mak Jessé nia aman; Jessé fali mak liurai David nia aman.
David, ho Urias nia fen, hahoris Salomaun. Salomaun mak Roboaun nia aman; Roboaun Abias nia aman; Abias Asá nia aman. Asá mak Josafat nia aman; Josafat Joraun nia aman; Joraun Ozias nia aman. Ozias mak Joataun nia aman; Joataun Acaz nia aman; Acaz Ezequias nia aman. Ezequias mak Manassés nia aman; Manassés Amós nia aman; Amós Josias nia aman. Josias mak Jeconias ho nia maun-alin sira nia aman, iha tempu dadur nian iha Babilonia.
Liu tiha tempu dadur nian iha Babilonia, Jeconias hetan oan naran Salatiel. Salatiel mak Zorobabel nia aman; Zorobabel mak Abiude nia aman; Abiude Eliaquim nia aman; Eliaquim Azor nia aman. Azor Sadoq nia aman; Sadoq Aquim nia aman; Aquim Eliude nia aman; Eliude Eleazar nia aman; Eleazar Mata nia aman; Mata Jacob nia aman; Jacob hetan oan naran José, ne’ebé kaben ho Maria. Husi Maria moris Jezús, ne’ebé hanaran Kristu.
Jezús Kristu moris nune’e: José husu nanis ona atu kaben ho Maria, Jezús nia inan. Molok sira moris hamutuk, Maria ko’us tiha ona hodi Espíritu Santu nia kbiit. Nia laen José, ne’ebé ema di’ak no lakohi hamoe Maria, hakotu atu husik de’it nia. Nia hanoin daudaun buat ne’e, wainhira Na’i nia anju mosu ba nia iha mehi, dehan: “José, David nia oan, keta tauk simu Maria nu’udar ó-nia kaben, basá nia ko’us hodi Espíritu Santu nia kbiit. Maria sei tur ahi oan-mane ida ne’ebé ó sei hanaran Jezús, basá Nia mak sei soi povu husi sira sala.” Ne’e hotu mosu, atu halo tuir lia ne’ebé Na’i hato’o husi profeta, dehan: ‘Feto-raan ida sei ko’us no tur ahi oan mane ida, ne’ebé ema sei hanaran Emmanuel, katak Maromak ho ita».
Reflesaun
Festa Maria nia Natividade la hatán ba pergunta “oinsá Maria moris”, maibé ba pergunta seluk “saida mak sei akontese lahó feto ida-ne’e?”. Maria nia istória integra iha lia-loos ida ne’ebé ita la bele haluha: ema ida-idak mak únika, troka-laek. Maromak atu kumpre ninia redensaun Nia presiza feto ida-ne’e. Ninia “sim” ka ninia “lae” lori konsekuénsia sira. Maromak bele hili ema seluk maibé Nia konfia ba feto ne’e nia Oan-Mane nia moris. Jezús nia isin no raan mak Maria nia isin no raan. Jezús nia apelidu (dexendénsia) mak José nian, maibé ninia an nu’udar ema mak ida Maria nian.
Iha sentidu ida-ne’e Maria nia moris labele troka, nia moris únika, repete-laek, folin boot. Maibé se ida-ne’e loos ba nia, loos mós mai ita ida-idak. Ita la’ós rezultadu husi porakazu, no se ita moris ne’e tanba, hanesan Maria, ita lori ho ita motivu ida, razaun ida, ne’ebé ita de’it mak bele hala’o. Ita hateke ba feto ne’e nia istória tanba ita-nia istória ida-idak hanesan ho ninian: nu’udar nia tau iha mundu “istória nia motivu”, Jezús, nune’e mós ita iha devér atu tau iha mundu ho ita-nia moris, hilin sira no situasaun sira ne’ebé nakonu ho signifikadu.
Ohin ita festeja Nia hodi dehan katak nia únika, no nune’e ita mós dehan buat ruma kona-ba ita-nia an rasik: ita mós únika/u no ita simu bolun atu hala’o buat ruma úniku.
