Irmán, foin-sa’e no leigu sira,
Ita hahú ona ita-nia tinan pastorál, atividade barak la’o ona no tempu Páskua nian konvida ita atu hateke ba ita-nia moris no ninia akontesimentu sira ho matan pozitivu nian. Salezianu ida, ne’ebé mate foin-sa’e tanba kankru, uluk repete beibeik ba foin-sa’e sira iha grupu ne’ebé nia anima:
“Se, maski buat hotu, ha’u mak otimista, tanba Kristu Moris hi’as”.
Fiar ida ne’e tenke hamanas ita-nia estilu atu enfrenta situasaun no akontesimentu sira: ita-nia ksolok la depende husi oportunidade furak ne’ebé ita hetan, husi ema ne’ebé iha momentu ida ne’e fó importánsia mai ha’u ka husi ha’u-nia projetu ne’ebé la’o tuir ha’u-nia mehi.
Bainhira ita hasoru momentu susar sira, ita presiza hanoin ba Jezús nia moris, Ninia terus eh mate no Ninia moris hi’as; la’ós tanba ita hanoin: “Ohin la di’ak, maibé aban ‘pasti’ sei di’ak fali”: esperiénsia martir sira nian, hatudu mai ita katak bele hetan ksolok maski, iha ema hotu nia oin, parese katak Maromak la hatán ba sira-nia orasaun. Maibé sira ne’e iha laran metin iha Jezús nia prezensa iha momentu nakukun nian.
S. Francisco de Assis reza beibeik iha Krús nia oin: “Na’i kbiit no glória wa’in, leno ha’u-nia fuan nia nakukun”.
Bainhira ita fiar buat ne’e, ita bele sai sasin ksolok nian, hanesan foin-sa’e barak hein husi ita.
Iha Verifika Trienál, partisipante sira evidénsia dala barak importánsia sasin ksolok nian, hodi tau fraze ida ne’e iha prosesu ruma. De faktu, se mak fiar ba ksolok kazamentu nian se katuas ida ko’alia aat de’it kona-ba ninia ferik oan? Ka se mak bele hili moris relijioza, se relijiozu sira hatudu “oin Kuarezma nian”, hanesan Amu-Papa Francisco dehan?
Ba foin-sa’e sira ne’ebé halibur hamutuk iha Roma ba Pre-sinodu, Amu-Papa hateten:
“Ita presiza atu konkista fali entusiazmu fiar nian no gostu atu buka. Ita presiza hetan fali, iha Na’i, kbiit atu hamriik fali depoizde frakasu sira, ita presiza ba oin, ita presiza hametin konfiansa iha futuru.”
Iha momentu ida ne’e, ita presiza duni hametin konfiansa ba futuru tanba Timor oan sira prepara an mós ba eventu importante: votasaun! Don Bosco dehan katak ninia politika mak politika Ami Aman nian, maibé bainhira buat ruma kona Kreda nia apostoladu ka foin-sa’e sira nia moris, nia la ta’uk atu espresa ninia hanoin ba ministru sira (uluk ladún iha meiu komunikasaun sira, nune’e, se presiza hato’o keixa ida, tenke ba atu ko’alia direitamente) no prontu atu sai mediadór entre Kreda no Governu iha momentu ne’ebé relasaun la di’ak iha Italia.
Nu’udar sarani, ita presiza hili ema sira ne’ebé la buka sira-nia interese rasik, maibé defende sira ne’ebé la iha forsa no suporta eh luta no tane aas valór umanu no sarani sira.
Iha ita-nia Programasaun Inspetoriál, ita hili liña asaun ida ne’ebé ko’alia kona-ba “promove justisa, dame, ekonomia solidaria, defende moris no direitu umanu”, nune’e ida ne’e bele sai kriteriu ida atu hili ema sira. Eleisaun sei monu iha fulan Maiu: ita harohan ba Na’in Feto atu eleitór hotu bele ba vota hodi tuir sira-nia konxiénsia no hodi hanoin ba bem komún.
Bom tempu Paskál no bom mese marianu
Ir Alma Castagna
