Selebra jubileu Osan-Mean Vida Konsagrada
Dili – Selebra tinan 50 Vida Konsagrada nian mak momentu ida «Magnificat eh gratidaun nian, uluknanai ba Maromak nia fidelidade» no tuirmai ba ema ne’ebé, «tanba Maromak fiél, nia mós hakarak sai fiél», ne’e mak segredu ksolok Ir Maria Letizia nian iha ninia vokasaun saleziana.
Ir Maria Letizia, mak misionária FMA italiana ida, ne’ebé tinan kotuk selebra tiha ona tinan 25 nu’udar misionária saleziana, no tinan ne’e, halo aniversáriu da-50 nu’udar relijioza FMA.
Amu-Bispu Dioseze DIli nian, D. Virgílio do Carmo da Silva SDB,ne’ebé prezide Eukaristia hamutuk ho amlulik na’in neen, kompara Irmán Maria Letizia nia moris ho “ai-funan roza” ne’ebé fó domin no hamorin labarik no foin-sa’e oan-kiak no ki’ik sira nia moris; “loron-matan” ne’ebé sai naroman no hamanas fuan malirin no dezesperadu sira; no “viola” ne’ebé anima sira ne’ebé laran susar no terus. Irmán Maria Letizia mak Irmán ne’ebé hanesan S. Agostinho hateten, “la hakmatek se la’ós iha Maromak”, ne’ebé «la hakmatek se la partilla buat ne’ebé nia rona no esperiénsia ho Jezús» hanesan buat ne’ebé Filipe halo ho Natanael (Jo 1,45-51) no iha nia ksolok ne’e nia la rai ba nia an, maibé fahe ba kiak sira. Karakterístika ida Amu-Bispu Virgílio observa iha Ir Maria bainhira iha orfanatu Venilale, molok ne’e iha Laga, mak “servisu maka’as, paixaun boot, la hatene kolen”, preokupa ho labarik sira nia hahán, toba di’ak ka lae, ho sira nia estudu “to’o dala ruma ba diskute malu ho kepala sekolah sira”, preokupa ho saúde (to’o lori orfán ida ba Austrália), preokupa ho sira-nia moris sarani…, ida-ne’e hatudu oinsá ninia domin boot ba foin-sa’e sira”.
Amu Virgílio temi Don Bosco nia liafuan sira kona-ba vokasaun saleziana: “«Maromak haruka ha’u atu tau matan ba foin-sa’e sira», feto no mane, ki’ik no boot, «ne’e duni ha’u tenke hapara atividade hotu ne’ebé hadook ha’u husi foin-sa’e sira». Nune’e, ba Don Bosco nia oan sira, objetivu prinsipál mak tau matan ba foin-sa’e sira. «Esperiénsia hatudu katak salezianu (saleziana eh membru Família Saleziana) ne’ebé iha domin uitoan ba foin-sa’e sira niasei lakon ninia vokasaun»… No Don Bosco mós dehan, «Salezianu ida ne’ebé fiél nafatin ba ninia vokasaun, nia sei kontente nafatin», hanesan madre Maria Letízia”, Amu-Bispu Virgílio konfirma.
Ir Asunta Sumiko Inoue, Konselleira Vizitadora mós, iha ninia liafuan mós evidensia karakterístika “karidade, pasiénsia no laran-manas” ne’ebé Ir Maria iha, tuir loloos perfíl ne’ebé Don Bosco hakarak atu FMA sira iha (Kf Konstituisaun FMA nia introdusaun).
Partisipa iha selebrasaun Irmán sira husi komunidade FMA, antigun/a alunu/a sira iha orfanatu Venilale no Laga ho sira-nia família, iha mós reprezentante husi orfanatu Venilale, Laga. Depoizde almosu konfraternizasaun nian, labarik no foin-sa’e husi komunidade orfanatu Venilale, husi Laga, husi Balide no Divina Providénsia, aprezenta sira-nia teatru ida ho títulu «Husi fini ba fini», ne’ebé hakarak hatudu oinsá fini ne’ebé misionária sira, ho modu partikulár Ir Maria Letizia kuda, tau matan, oras-ne’e sai ai-hun no fó fuan ne’ebé tebar”.
Fidelidade no perseveransa “fructuosa” mak buat ne’ebé ohin ita selebra. «Irmán Maria iha tinan 50 nia laran, maski iha dezafiu oioin ne’ebé nia hasoru iha moris, maibé ninia fidelidade ba vokasaun sai sasin moris nian mai ita hotu”. Ho prezensa foin-sa’e sira tempu orfanatu nian ne’ebé Ir Maria tau matan ho sira-nia oan sira hatudu “fidelidade ne’ebé fó fuan”.
Sá loos perspetiva futuru nian ba Ir Maria Letizia? Fidelidade nafatin to’o Na’i nia loron: “Ó-nia lámpada lakan nafatin husi kalan to’o dadeer iha Maromak nia futar oin”. Ne’e mak liafuan sira akompaña bainhira Ir Assunta entrega símbolu ahi-oan lakan. «Mai ha’u jestu ne’e iha signifikadu boot liu. Ha’u fiar no espera katak bainhira Jezús bolu ha’u ba dala ikus, ha’u atu bá hasoru Nia nu’udar ‘espoza’ ho lámpada lakan, hodi tau mina loroloron katak reza, rona Nia, simu nia iha Eukaristia no hamutuk ho Nia lori domin ba ema hotu ne’e ha’u hakbesik ka hakbesik ha’u loroloron… Knananuk komuñaun ne’ebé ha’u rasik hili (“Gesù, Re di Gloria) dehan: “Sé mak bele haketak ha’u husi Ita-nia domin? Ita sei fó mai ha’u koroa glória ida, Ita sei fó mai ha’u bainhira loron ida ha’u sei hasoru Ita, ha’u hein Ita ha’u-nia Na’I, ha’u hein iIta ha’u-nia Liurai”. Ita reza atu sai realidade mai ha’u no mai ita hotu. Ho Maria Auxiliadora ita hotu sei halo festa ne’ebé la hotu iha Lalehan».
