Hodi tuir siklu katekeze nian kona-ba família, Papa Francisco reflete, iha kuarta 11 Fevereiru, kona-ba oan sira. Amu-Papa ko’alia tiha ona kona-ba inan no aman sira no tema kuarta ne’e mak reflesaun kona-ba don boot oan sira-nian ba família no ba sosiedade tomak.
“Oan sira mak ksolok família no sosiedade nian, la’ós problema ida biolojia reprodutiva nian, modu ida realizasaun eh posesu ida aman-inan sira-nian; oan sira mak don ida, prezente ida”.
Tuir Papa Francisco, sai oan, iha Maromak nia projetu, mak lori iha nia an memória no esperansa domin ida nian ne’ebé realize an hodi fó moris ba ema seluk. No oan ida-idak mak úniku ba aman-inan sira. Nu’udar ezemplu, nia hanoin fali nia família rasik: nia haktuir katak nia inan, bainhira ema husu sé mak nia oan preferidu, nia hateten katak nia oan na’in lima hanesan ninia liman-fuan lima, hasai naran ida e’it husi nia sei halo falta. “Oan sira diferente ba malu, maibé hotu-hotu oan”, Amu-Papa esplika.
Francisco destaka mós katak iha profundidade “sai oan nian” mak bele deskobre dimensaun gratuita domin nian, se inan-aman sira hadomi ona sira-nia oan molok sira moris. Ezemplu ida husi buat ne’e mak jestu feto isin-rua barak ne’ebé, iha Prasa S. Pedro, husu Amu-Papa fó bensan ba sira nia kabun.
Oan sira, husi sira-nia parte, Papa Francisco resalta, tenke fó onra baa man no inan, hanesan ukun-fuan dahaat hanorin, ne’ebé soi buat ruma sagradu, divinu no nu’udar abut ba tipu hotu respeitu nian entre ema. “Sosiedade ida oan sira-nian ne’ebé la onra aman-inan sira mak sosiedade ida lahó onra; bainhira la onra inan-aman sira, ema lakon nia onra rasik”.
Sosiedade lahó oan sira
Papa Francisco iha katekeze temi mós kona-ba realidade aman-inan sira ne’ebé lakohi iha oan sira. Tuir nia, sosiedade ida ne’ebé lakohi oan sira hadulas nia, tanba konsidera nu’udar naha todan eh preokupasaun ida, sosiedade ne’e halakon an.
Nu’udar ezemplu, realidade Europa nian, iha-ne’ebé taxa oan-moris nian la to’o 1%. Iha kontestu ne’e nia sita ensíklika Humanae vitae, Paulo VI nian, ne’ebé dehan katak iha oan barak labele sai hilin ida ne’ebé la responsavel. Maibé la iha oan mak hilin egoista ida. “Moris sai foin-sa’e no manán enerjia hodi hakbarak”, Papa Francisco hateten.
Remata nia reflesaun, Papa Francisco espresa ninia satisfasaun atu haree aman no inan barak ne’ebé foti sa’e sira-nia oan sira iha Prasa S. Pedro atu sira simu bensan. Ne’e mak jestu ida kuaze divinu, Amu-Papa hateten. “Obrigadu tan imi halo buat ne’e!”, nia remata.
