FESTA AGRADESIMENTU KOMUNIDADE FMA FUILORO
Fuiloro, 24 Jullu loron ne’e sai loron importante ba ami komunidade Beata Maddalena Morano Fuiloro, tanba loron ne’e mak ami nia Komunidade fahe ksolok no agradese ba malu iha tinan ida nia laran ne’ebé ami hela hamutuk. Tema ba ami nia agradesimentu mak “OBRIGADA BA DOMIN NE’EBÉ SIMU NO FAHE”. Semana ida nia laran ami nia preparasaun ba festa ne’e mak reza ba malu hahu husi loron 15 Jullu to’o 24 Jullu: ba Menina Kolejiu ETA & KURSUS sira, Kolaboradores, Padre Salesiano sira ne’ebé tulun ami Spiritualmente, Irmã ida-idak ikus iha loron 24 Jullu taka ho agradese ba Superiora nu’udar Nain Feto nia prezensa inan nian no tali Komuñaun nian iha Komunidade.
Iha lokraik ami nu’udar Komunidade hahi no Agradese Maromak ba moris hamutuk durante tinan ida nia laran liu husi Eukaristia Santa ne’ebé selebra husi Padre José de sá, SDB. Iha nia omilia padre subliña liu kona ba leitura ne’ebé foti husi Karta ba Saun Paul iha 1 Korintu 13: 1-13, ne’ebé koalia kona ba Domin, ne’ebé pratikamente iha moris komunidade tanba ita ema diferente tan ne’e presiza tebes kria domin iha ita ida-idak nia fuan atu hatene hadomi hanesan Nai Jesus hadomi ita.
Eukaristia ikus nian taka ho bensaun Maria Auxiliadora nian ba ami hotu, tanba ho Nain Feto nia tulun ami sente katak Misaun hotu ne’ebé ami hala’o ba foinsae sira nafatin iha Nain Feto nia Prezensa.
(Ines Bartolo Freitas FMA)
