Mensajen Kondolénsia husi Madre Chiara Cazzuola, hodi Institutu FMA tomak nia naran, ba Papa Francisco nia mate, ne’ebé akontese iha loron 21 fulan-abríl tinan 2025.
Roma (Itália). Iha loron 12 fulan-abríl tinan 2025, ho tinan 88, depois de tinan 12 Pontifikadu nian, Papa Francisco husik moris iha rai ida ne’e. Anúnsiu ne’e hato’o husi Kardeál Kevin Joseph Farrell, Camerlengo husi Santa Igreja Romana:
“Iha tuku 7:35 dadeer ne’e Bispu Roma nian fila hikas ona ba Aman nia uma.Nia moris tomak dedika ba Na’i no Kreda nia servisu.”
Superiora Jerál Institutu Filhas de Maria Auxiliadora, Madre Chiara Cazzuola, iha nia viajen ba Vietnam, lori FMA tomak nia naran, haruka mensajen kondolénsia ba Sekretáriu Estadu Santa Sé, Kardeál Pietro Parolin:
Eminénsia,
Hodi aprende, ho laran-susar tebes, notísia katak Santu Padre Francisco, ohin, 21 Abríl 2025, Segunda-feira oitava Páskua nian, fila hikas ona ba Aman nia Uma, hodi ha’u-nia naran no hodi Institutu Filhas de Maria Auxiliadora tomak nia naran, ha’u asigura ha’u-nia orasaun ba nia.
Ha’u agradese ba Na’i ba prezente ne’ebé nia iha ba umanidade no ba Kreda universál.
Ami-nia Fundadór sira, Don Bosco no Madre Mazzarello, husik hela mai ami nu’udar liman rohan atu iha domin ba Amu-Papa nu’udar Vigáriu Kristu nian.
Iha momentu ida-ne’e, ami sente iha komuñaun ho Kreda tomak no ho sira ne’ebé esperimenta ona iha Papa Francisco sinál ida Maromak nia Mizerikórdia nian ne’ebé hakuak ema hotu la hó distinsaun.
Nu’udar Institutu, ami esperiénsia ona ninia proximidade paterna no ninia guia afetuozu no enkorajador iha sirkunstánsia barak, maibé liuliu iha enkontru ho partisipante sira Kapítulu Jerál XXIV nian iha Roma iha uma jeral, iha loron 22 Outubru 2021. Ninia liafuan sira agora hela nafatin hanesan testamentu ida ba ami-nia Família relijioza: «Responsabilidade boot maka atu kolabora ho kreatividade Espíritu Santo nian, atu vizita fila fali karizma no asegura katak nia espresa ninia vitalidade ohin loron. Husi ne’e mak mai “juventude” loloos, tanba Espíritu hafoun buat hotu… Keta haluha grasa orijen nian, haraik-an no halo-an ki’ik, inísiu sira-nian ne’ebé halo Maromak nia asaun sai transparente iha moris no mensajen sira-ne’ebé, nakonu ho maravilha, hahú viajen ida-ne’e. Maria Auxiliadora sei tulun imi: imi mak nia oan-feto sira!».
Ami asegura ami nia orasaun intensu no nakonu ho esperansa, atu nune’e Na’i Moris-Hi’as bele haraik ba nia moris rohan-laek no ba umanidade tomak dame ne’ebé nia rasik invoka beibeik.
Tradusaun husi :https://www.cgfmanet.org/infosfera/chiesa/grazie-papa-francesco/
