Dili – Ohin, loron Segunda-Feira, dia 23/03/2020, ami Novisa 2˚ ano halo no halo ofisina ka Laboratorio kona ba Votu Kastidade nian. Nu’udar grupu ami halo rezumu ba artigu hirak ne’e ho figura “aihun ida” . Kastidade ne’ebe ita moris nu’udar resposta ida ba Aman nia Prezente , mak sai hanesan fini kiik ida ne’ebe ita simu no kuda iha ita nia an (art 12), atu fini ne’e sai buras no moris presiza be’e ne’ebe bele tulun nia atu kontinua moris, ne’e mak Orasaun no asetismu, hodi kuda-an iha Maromak nia prezensa, hetan kbiit husi Ninia liafuan, Sakramentu sira (Eukaristia no Rekonsiliasaun) no hadook-an husi buat ne’ebe laos Maromak nian (art.17). Be’e deit la to’o atu sustenta fini ida ne’e presiza mos rai metan ne’e mak artigu 16 “iha tempu susar fo fuan” ema ne’ebe simu bolun atu saran-an ba Maromak tenke kontempla beibeik Kristu iha Kruz, Kruz hanesan livru ida atu aprende saida mak domin, no oinsa ita tenke hadomi Maromak no maun-alin sira.
Wainhira fini ne’e hahu buras, nia sei iha hun ne’ebe metin iha Komuñaun Fraterna (art.15) iha ne’ebe iha komunidade laran kria ambiente ida ne’ebe ho domin resiproku tulun malu atu buras. Membru komunidade ida tau buat ne’ebe nia iha ho laran luak bele hari komunidade resiprokamente iha karidade, domin ne’ebe la preokupa atu simu maibe atu fo. Wainhira ai ne’e metin sei supota ninia tahan, funan no fuan, ho ita nia votu Kastidade ida ne’e ita sai sasin domin nian iha Kreda (art. 13), sai sinal unidade entre Kreda ho Kristu hodi saran ita nia kbiit domin nian tomak ba Maromak nia servisu no renunsia ba buat hotu ne’ebe kontra votu ida ne’e. Nu’udar Don Bosco hanorin katak kastidade sai nu’udar ita nia karakterististika espesial liu ba ita nia espiritualidade no metodu atu eduka diak tan ne’e ita sei moris ho kualidade aas liu (art.14).
Hodi haklean artigu hirak ne’e ami mos deskobre dezafiu balun ne’ebe bele mosu ohin no aban-bairua iha moris liuliu relasiona ho votu ida ne’e mak hanesan: taka-an no la hola parte iha mmentu komunitariu sira, indiferente tan ida-idak nia preokupasaun, buka hari relasaun partikular, atitude ne’ebe la hari komuñaun fraternal, uza media social la responsavel. Hare ba dezafiu sira ne’e ami koko atu buka ninia solusaun no ida ne’e sai hanesan bukae ida ba ami se wainhira ami hasoru situasaun sira ne’ebe temi ona iha leten. Solusaun sira ne’e mak: loke-an ba Diretora no diretor espiritual atu hetan tulun, uza meiu komunikasaun ho responsavel (ho motivo estudu no misaun), hakbiit-an nafatin ho Maromak nia grasa: Sak. Eukaristia no Rekonsiliasaun, Maromak nia Liafuan, Konstituisaun, Koloquio no Orasaun pessoal.
Ami agradese ba Me. Esmeralda ne’ebe fo oportunidade atu haklean artigu hirak ne’e no atividade ida ne’e taka ho mensajen badak husi Madre Maestra katak laos estuda deit hotu ona, maibe tau iha moris, kolabora nafatin ho Maromak nia grasa atu sai personalidade ida deit iha Maromak futar oin, iha Komunidade no iha misaun ne’ebe ita ba. Buka atu sai sincera nafatin no buka tulun se hetan dezafiu ruma. Obrigada barak.
(Novisa 2˚ano)
