Cailaco – Grupo opiam iha Cailaco entuzismo los hala’o sira knaar no sira nia misaun nu’udar opiam iha sira nia fatin. Iha loron 13/8/2017 depois de missa grupo opiam ba hala’o aksaun karitativa iha foho vizita labarik, ferik no katuas sira ne’ebe moras. Sira ne’ebe ba hala’o vizita ne’e hamutuk 28 pessoas hamutuk ho Me. Elizita Gonzaga FMA nu’udar koordenadora OPIAM iha Cailaco. Kuitadu mane mak la iha tanba tempu ferias sira hotu fila ba sira nia suku, tan ne’e feto deit, hahu husi SD to’o SMP. Maske dook presija oras 3 atu to’o iha fatin ne’ebe atu ba maibe sira nafatin semangat maske tenke sa’e no tun foho, sira pronto nafatin. Buat ne’ebe sira halo mak lori sasan ne’ebe sira iha hanesan sabaun, rinso, shampoo, masako, susuben enak no roupa ne’ebe la to’o ona ba sira maibe sei bele hatais sira lori ida ne’e ba vizita no fahe ho sira ne’ebe presija liu. Kada familia ne’ebe sira vizita sira to’o konta istoria ho sira, koalia ho sira no esplika oituan kona ba sira nia an no sira nia misaun hafoin reza hamutuk ho familia sira ne’ebe sira vizita. Sira halo ida ne’e tanba sira hakarak halo solidariedade ho sira ne’ebe kiak no fraku. Hahalok ida ne’e mos halo parte iha sira nia karizma nu’udar OPIAM: partilhar, solidariedar e rezar.
Wainhira fila mai uma, tuir dalan sira ida-idak fahe sira nia esperiensia: ami sente hamlaha no kole maibe ami kontente tanba ami bele hasoru ema ne’ebe kiak liu fali ami no fahe ho sira buat ne’ebé ami iha. Wainhira vizita hotu tiha familia ami hotu konsentra hamutuk iha familia ida nia uma hodi reza tersu hamutuk tanba momentu ne’e Nain Feto husi Kapela Marco halo hela vizita iha fatin ne’ebé ami ba.
(ElizitaGonzaga)
