Sidade Vaticano – Orasaun “Ami Aman” mak orasaun Maromak nia oan sira nian. “Ne’e mak orasaun boot ne’ebé Jezús hanorin mai ita. Orasaun ne’e entrega mai ita iha loron Batizmu nian. Orasaun “Ami Aman” halo ita moris Kristu Jezús nia sentimentu rasik. Bainhira ita harohan “Ami Aman”, ita harohan hanesan Jezús harohan. Jezús rasik halo no hanorin ba dixípulu sira ne’ebé dehan ba Nia: “Mestre, hanorin ami harohan hanesan ita harohan”.
Ba Amu-Papa, sarani sira, liuhusi batizmu no Espíritu Santu ema moris nu’udar Maromak nia oan sira, hetan formasaun liuhusi Jezús nia hanorin divinu no diriji ba Maromak hodi bolu nia Aman. Papa Francisco husu: “Orasaun ida ne’ebé mak di’ak liu duké ida Jezús hanorin atu dispoin ita ba Komuñaun sakramentál ho Nia?”
Alleinde iha Missa, ita harohan “Ami Aman” iha asaun oioin moris sarani nian, hatudu atitude filiál ba Maromak, fraternidade ho maluk sira no husu “paun loroloron nian” ho referénsia espesiál ba Paun eukarístiku. Durante orasaun sarani sira husu Maromak nia perdaun no kompromete an atu perdua sira ne’ebé ofende sira. “Perdua ema ne’ebé ofende ita la’ós fasil; ne’e grasa ida ne’ebé ita tenke husu”, Amu-Papa fó hanoin.
Iha finál orasaun Ami Aman, hodi husu libertasaun husi buat aat, sarani sira husu liberdade husi buat hotu ne’ebé haketak sira husi Maromak no iha maun-alin sira nia leet. “Ita komprende didi’ak katak ne’e mak pedidu sira ne’ebé adekuadu atu prepara ita ba Santa Komuñaun”, nia afirma. Orasaun “Ami Aman” kontinua husi amlulik nia orasaun, bainhira nia hahú ritu pás nian, ne’ebé husu atu haboot Igreja nia unidade no pás.
Jestu pás nian tuir kedas jestu silu Paun, akompaña ho invokasaun “Maromak nia Bibi-Oan” ne’ebé halo atu asembleia rekoñese Maromak nia Bibi-Oan loloos, Kristu Makso’ik. “Sadia ami”, “haraik dame mai ami” mak “invokasaun sira ne’ebé, husi orasaun “Ami Aman” to’o silu Paun, ajuda ita prepara ita-nia neon atu partisipa iha konvite eukarístiku, hun komuñaun nian ho Maromak no ho maun-alin sira”, Amu-Papa enfatiza.
Atu taka, Papa Francisco konvida sarani sira atu nunka haluha orasaun ne’ebé Jezús hanorin: “Orasaun ida-ne’e prepara ita ba komuñaun” no nia mós husu sira reza hamutuk “Ami Aman”.
